Wararka24: Dowladda Federaalka Soomaaliya ayaa shaacisay in ciidamada Kumaandooska Danab ay howlgal qorsheysan ka fuliyeen degmada Gamboole ee gobolka Shabeellaha Dhexe, halkaas oo lagu soo badbaadiyay dad rayid ah oo ay afduub u haysteen Al-Shabaab.
War-saxaafadeed kasoo baxay Wasaaradda Gaashaandhigga Soomaaliya ayaa lagu sheegay in howlgalka lagu soo furtay sagaal qof oo shacab ah, kuwaas oo kooxda ay hore u qafaasheen.
Dowladda ayaa sidoo kale sheegtay in intii uu socday howlgalka ay ciidamada dileen shan xubnood oo ka tirsanaa Al-Shabaab, oo uu ku jiray horjooge kooxda hoggaaminayay.
“Ciidamada ayaa ku guuleystay inay dib xorriyaddooda ugu soo celiyaan sagaal qof oo ay afduub u haysteen argagixisadu, iyagoo sidoo kale dilay shan xubnood oo ka tirsanaa Khawaarijta,” ayaa lagu yiri bayaanka dowladda.
Qoraalka kasoo baxay Wasaaradda Gaashaandhigga laguma sheegin sababta dadka rayidka ah loo afduubtay iyo muddada ay kooxda gacanta ku haysay.
Howlgalkan ayaa qayb ka noqonaya howlgallada ciidamada dowladda iyo kuwa deegaanka ay ka wadaan deegaannada gobolka Shabeellaha Dhexe, halkaas oo muddooyinkii dambe ay ka jireen dagaallo iyo dhaq-dhaqaaqyo ciidan.
Dowladda Federaalka ayaa mar kale ku celisay inay sii wadeyso howlgalada ka dhanka ah Al-Shabaab, si loo xaqiijiyo amniga guud ee dalka iyo badbaadinta shacabka ay dhibaateeyaan kooxaha hubeysan.
Wasaaradda Gaashaandhigga iyo Taliska Ciidanka Xoogga Dalka Soomaaliyeed ayaa sheegay inay ka go’an tahay dardargelinta howlgalada lagu ciribtirayo haraadiga kooxaha argagixisada, si shacabka Soomaaliyeed ay ugu noolaadaan nabad iyo xasillooni.
war-saxaafadeedka
