Wararka24: Madaxweyne ku-xigeenka maamulka Galmudug Cali Daahir Ciid ayaa taageeray geeddi-socodka doorashooyinka qof iyo cod ee ka socda Koonfur Galbeed iyo diiwaangelinta kasocota Galmudug, xilli ay sii xoogeysaneyso xiisadda siyaasadeed ee ka dhex taagan madaxda Galmudug iyo Dowladda Federaalka Soomaaliya.
Cali Ciid ayaa warsaxaafadeed uu soo saaray ku sheegay inuu soo dhoweynayo bilaabista diiwaangelinta codbixiyeyaasha iyo qeybinta kaararka codbixinta ee Galmudug. Wuxuu tilmaamay in tallaabooyinkaasi ay muhiim u yihiin hirgelinta nidaamka dimuqraadiyadeed ee qof iyo cod.
Madaxweyne ku-xigeenka ayaa sheegay in horumarrada laga gaaray geeddi-socodka dimuqraadiyadda ay muujinayaan rabitaanka shacabka iyo dadaalka lagu xoojinayo dowladnimada. Waxa uu xusay in nidaamka qof iyo cod uu muwaadiniinta siinayo fursad ay si toos ah ugu doortaan hoggaankooda.
Hadalka Cali Ciid ayaa kusoo aadaya xilli uu jiro khilaaf siyaasadeed oo u dhexeeya Madaxweynaha Soomaaliya Xasan Sheekh Maxamud iyo Madaxweynaha Galmudug Axmed Cabdi Kaariye (Qoor-Qoor) . Xiisaddaasi ayaa si weyn looga dareemayaa magaalada Dhusamareb.
Villa Somalia ayaa la sheegay inay walaac ka qabto in Madaxweyne Qoor-Qoor uu carqaladeeyo doorashooyinka golaha deegaanka iyo baarlamaanka Galmudug ee la qorsheeyay inay dhacaan bilaha June iyo July. Doorashada hoggaanka Galmudug ayaa sidoo kale lagu wadaa inay qabsoonto 9-ka July.
Qoor-Qoor ayaa doonaya inuu mar kale ku soo laabto xilka madaxtinimada Galmudug, halka Dowladda Federaalka ay taageereyso musharrax kale. Khilaafka labada dhinac ayaa sare u qaaday cabsida laga qabo in xaaladda siyaasadeed ay isu beddesho gacan ka hadal.
Wararka ayaa sidoo kale sheegaya in Dowladda Federaalka ay ku guuleysatay inay taageero ka hesho qaar kamid ah saraakiisha booliska iyo nabad-sugidda Galmudug, halka militariga ku sugan Dhuusamareeb loo arko caqabadda ugu weyn ee hortaagan qorshaha dowladda.
