Wararka24: Golaha Deegaanka magaalada Hargeysa ayaa maanta doortay maayir iyo maayar ku xigeen cusub, kadib kalfadhi aan caadi ahayn oo ka qabsoomay xarunta Dawladda Hoose ee Hargeysa.
Xubnaha Golaha Deegaanka ayaa u doortay Cabdirisaaq Maxamed Faarax Wiiwaa inuu noqdo maayirka cusub ee caasimadda, halka Aadan Jaamac Xaddi Mideeye loo doortay jagada maayar ku-xigeenka magaalada.
Maayirka cusub Cabdirisaaq Maxamed Faarax Wiiwaa ayaa hadal uu jeediyay kadib doorashadiisa ku sheegay in kalfadhigu u dhacay si nabad ah oo hufan. Wuxuu ballanqaaday inuu dardargelin doono adeegyada iyo shaqooyinka muhiimka ah ee caasimadda Hargeysa.
Wiiwaa ayaa sidoo kale xubnaha Golaha Deegaanka ka codsaday inay la shaqeeyaan si loo horumariyo magaalada. Waxa uu sheegay in maamulka cusub uu xoogga saari doono tayeynta adeegyada bulshada iyo horumarinta caasimadda.
Doorashadan ayaa timid kadib markii isla maanta xilka laga qaaday maayirkii hore ee Hargeysa Cabdikariin Axmed Mooge, iyo ku-xigeenkiisii Khadar Axmed Cumar.
Mooshinka xil ka qaadista ayaa lagu sababeeyay eedo la xiriira gudasho la’aan waajibaad shaqo iyo arrimo kale oo dhinaca maamulka ah, sida ay sheegeen xubno kamid ah Golaha Deegaanka. Kulanka lagu ansixiyay mooshinka ayaa waxaa shir guddoominayay Guddoomiyaha gobolka Maroodi-jeex.
Warbaahinta dowladda Somaliland ayaa sheegtay in inta badan xubnaha Golaha Deegaanka ay kasoo qeyb-galeen kulanka, iyadoo goobta ay sidoo kale joogeen masuuliyiin ka tirsan maamulka Dawladda Hoose ee Hargeysa.
Doorashadan cusub ayaa kusoo aadeysa xilli ay jiraan dooddo siyaasadeed iyo isbeddello dhinaca maamulka ah oo ka socda gudaha Somaliland, gaar ahaan magaalada Hargeysa.
