Wararka24: Warar kasoo baxaya magaalada Tripoli ee dalka Libya ayaa sheegaya in xaalad adag ay wajahayaan Soomaalida tahriibka ku joogta halkaasi, kadib markii la sheegay in kooxo magafayaal ah ay bilaabeen afduubyada lagu hayo muhaajiriinta.
Qaar kamid ah Soomaalida ku sugan Tripoli ayaa sheegay in boqolaal qof la la’yahay meel ay ku dambeeyeen, iyadoo la tuhunsan yahay in qaarkood ay gacanta u galeen kooxo magafayaal ah, halka kuwo kalena ay qabteen laamaha ammaanka ee dalkaasi. Arrintan ayaa cabsi iyo jahwareer ku abuurtay bulshada Soomaalida ee halkaasi ku nool.
Muuse Axmed oo kamid ah Soomaalida ku nool Tripoli ayaa sheegay in dadka qaar lagu qaaday gaadiid aan la aqoonsan, kuwaas oo aan u muuqan kuwa ay leeyihiin ciidamada ammaanka. Wuxuu tilmaamay in xaaladdu ay kasii dareyso maalinba maalinta ka dambeysa.
Waxaa sidoo kale la muujiyay cabasho ku saabsan kaalinta safaaradda Soomaaliya ee Liibiya. Dadka deegaanka qaarkood ayaa sheegay in aanay helin taageero iyo jawaab ku filan oo uga timaadda safaaradda, xilli ay wajahayaan xaalado amni iyo nololeed oo adag.
Soomaalida ku sugan Liibiya ayaa la sheegay inay yihiin kuwo aad ugu nugul afduubyo, xarig iyo tacaddiyo kale, maadaama badankood aysan haysan dukumentiyo rasmi ah. Qoysas badan ayaa sidoo kale la kulma cadaadis la xiriira lacago madax furasho ah oo laga dalbado.
Liibiya ayaa muddo dheer ahayd marin ay isticmaalaan muhaajiriinta ka imaanaya dalalka Afrika ee doonaya inay u gudbaan Yurub. Dalkaasi waxaa ka jira kooxo hubeysan iyo shabakado ka ganacsada dadka, kuwaas oo inta badan bartilmaameedsada tahriibayaasha.
Xaaladda cusub ayaa sare u qaaday walaaca laga qabo badqabka Soomaalida ku xayiran gudaha Liibiya, iyadoo ehellada iyo qoysaskooda ay dalbanayaan in loo fidiyo gargaar iyo taageero degdeg ah.
DAAWO
