Wararka24: Siyaasiyiinta mucaaradka Soomaaliya ayaa war cusub kasoo saaray dibadbaxa ay qorsheynayaan inuu berri ka dhaco magaalada Muqdisho, iyagoo faahfaahin ka bixiyay waqtiga iyo ujeeddada isu soo baxaasi.
Ra’iisul wasaarihii hore ee Soomaaliya Xasan Cali Khayre oo shir jaraa’id qabtay ayaa sheegay in dibadbaxu si rasmi ah u bilaaban doono 7:00 subaxnimo, isaga oo shacabka ugu baaqay inay si buuxda uga qeyb qaataan.
Khayre ayaa sheegay in dibadbaxan uu yahay mid lagu raadinayo xuquuq siyaasadeed iyo mid bulsho, isagoo tilmaamay in shacabka looga baahan yahay inay si nabad ah u muujiyaan aragtidooda.
Wuxuu sidoo kale ka digay in waxyeello loo geysto dadka kasoo qeyb galaya isu soo baxa, isaga oo xusay in haddii rabshado ama dhibaato dhacaan ay mas’uuliyadda dusha ka saaran tahay dowladda federaalka.
Xasan Cali Khayre ayaa ugu baaqay ciidamada ammaanka in aan loo adeegsan dano siyaasadeed, isla markaana aysan dhibaateyn shacabka, gaar ahaan dadka barakacayaasha ah ee lagu wado inay qeyb ka noqdaan dibadbaxa.
Mucaaradka ayaa ku adkeystay in dibadbaxoodu yahay mid nabadeed oo dastuurku oggol yahay, islamarkaana uusan ahayn mid lagu hurinayo qalalaase ama amni darro.
Hadalkan ayaa kusoo aadaya xilli dowladda Federaalka Soomaaliya ay si cad uga digtay isku soo baxa, iyadoo sheegtay in aan la oggolaan doonin wax kasta oo carqalad ku keeni kara amniga caasimadda.
Xiisadda siyaasadeed ee Muqdisho ayaa sii xoogeysaneysa iyadoo dibadbaxan uu kusoo beegmayo xilli ay socdaan dadaallo lagu doonayo wadahadal u dhexeeya dowladda iyo mucaaradka, si xal looga gaaro muranka doorashooyinka iyo xaaladda siyaasadeed ee dalka.
DAAWO
