Wararka24: Wafdi ka kala socotay Somaliland iyo ganacsato Israa’iili ah ayaa kulan ku yeeshay magaalada Addis Ababa ee dalka Itoobiya, kaas oo diiradda lagu saaray xoojinta iskaashiga ganacsi iyo maalgashi ee labada dhinac.
Kulanka ayaa waxaa hoggaaminayay Wasiirka Ganacsiga iyo Dalxiiska Somaliland, Cabdiraxmaan Xasan Nuur, halka dhinaca Israa’iil ay ka qeybgaleen wakiillo ganacsi iyo diblomaasiyiin la sheegay inay matalayeen danaha ganacsi ee dalkaas.
War-saxaafadeed kasoo baxay Wasaaradda Ganacsiga Somaliland ayaa lagu sheegay in wada-hadallada ay xoogga saareen fursadaha cusub ee iskaashiga dhaqaale, maalgashi iyo horumarinta xiriirka ganacsi ee labada dhinac.
Qodobada ugu muhiimsan ee laga wada hadlay ayaa waxaa ka mid ahaa iskaashiga beeraha, tamarta, tiknoolajiyadda, kaabeyaasha dhaqaalaha, adeegyada maaliyadda iyo caafimaadka, kuwaas oo loo arko inay yihiin qeybaha ugu muhiimsan ee maalgashi laga sameyn karo.
Wafdiga Somaliland waxaa sidoo kale qeyb ka ahaa masuuliyiin sare oo ka socday Bangiga Dhexe, hay’adaha caymiska iyo ganacsatada gudaha, kuwaas oo ka shaqeynaya sidii loo soo jiidan lahaa maalgelin dibadeed.
Ganacsatada Somaliland ee shirka ka qeyb galay ayaa waxaa hoggaaminayay Guddoomiyaha Ganacsiga Somaliland, Jamaal Aydiid Ibraahim, oo door muuqda ku lahaa wada-hadallada la xiriira horumarinta ganacsiga iyo maalgashiga.
Kulankan ayaa lagu sheegay inuu qeyb ka yahay dadaallada Somaliland ay ku dooneyso inay ballaariso xiriirrada dhaqaale ee caalamiga ah, isla markaana ay kusoo jiidato shirkado iyo maalgeliyeyaal shisheeye.
Wararka ayaa sheegaya in kulamadan ay horseedi karaan heshiisyo cusub oo ganacsi iyo maalgashi, inkastoo aan weli la shaacin heshiis rasmi ah oo labada dhinac kala saxiixdeen.
