Wararka24: Dowlada Soomaaliya ayaa isbeddel ku sameysay saraakiisha iyo ciidamada ku sugan baraha koontaroolka ee laga soo galo magaalada Muqdisho, iyadoo la beddelay ciidamadii iyo taliyeyaashii hore ee halkaas ka howlgalayay.
Tallaabadan ayaa lagu sheegay qorshe lagu xoojinayo ammaanka caasimadda, gaar ahaan goobaha muhiimka ah ee laga soo galo Muqdisho iyo meelaha lagu baaro gaadiidka. Warar laga helayo ilo amni ayaa tilmaamaya in qorshahan uu sidoo kale xambaarsan yahay ujeeddooyin siyaasadeed.
Saraakiil iyo ku-xigeennadoodii hore uga sugnaa koontaroollada magaalada ayaa loo wareejiyay gobollada dalka, kadib markii Villa Somalia ay go’aansatay in la keeno ciidamo iyo hoggaan cusub oo ay si dhow ugu kalsoon tahay.
Wararka ayaa sheegaya in ciidamada cusub lagu kala daadiyay gudaha magaalada iyo baraha koontaroolka, si loo adkeeyo xakameynta amniga iyo dhaqdhaqaaqa gaadiidka, xilli ay sii kordheyso xiisadda siyaasadeed ee la xiriirta arrimaha doorashooyinka.
Isbeddelka ugu weyn ayaa laga dareemay waddooyinka waqooyiga Muqdisho, gaar ahaan dhulka isku xira degmada Kaaraan iyo Suuqa Xoolaha, halkaas oo ciidamo hore uga howlgalayay la beddelay, lana keenay kuwo cusub.
Saraakiisha cusub ee loo magacaabay goobahaas ayaa la sheegay inay si toos ah uga amar qaadan doonaan taliska sare ee dowladda, iyadoo tallaabadan loo arko mid lagu xoojinayo saameynta Villa Somalia ee amniga magaalada.
Arrintan ayaa kusoo aadeysa xilli dalka uu ku jiro marxalad siyaasadeed oo xasaasi ah, islamarkaana ay taagan tahay muran xooggan oo ku saabsan hannaanka doorashooyinka iyo wadahadallada u dhexeeya dowladda iyo mucaaradka.
Mucaaradka ayaa dhankooda sii wada abaabul siyaasadeed iyo qorsheyaal dibadbax, halka dowladda ay adkeyneyso in amniga Muqdisho uu yahay mudnaanta koowaad, taas oo sii muujineysa sida xaaladda siyaasadeed iyo amni ay isugu xiran yihiin xilligan.
