Kooxda Al-Shabaab ayaa shan qof ku dishay magaalada Jilib ee gobolka Jubbada Dhexe, kadib markii ay ku eedeeyeen inay basaas u ahaayeen hay’ado shisheeye iyo kuwa dowladda Soomaaliya, sida ay sheegeen dadka deegaanka.
Ilo deegaanka ah ayaa sheegay in raggan si fagaare ah loogu dilay magaalada, kadib markii kooxda ay ku andacootay inay xog sirdoon u gudbinayeen dowladda Mareykanka, maamulka Jubbaland iyo Dowladda Federaalka Soomaaliya.
Dadka deegaanka ayaa sidoo kale sheegay in shanta nin markii hore lagu soo bandhigay goob ay shacabka ku sugnaayeen, ka hor inta aan la fulin dilkooda, arrin ay kooxda marar badan hore u isticmaashay si ay uga cabsi geliso dadka ku nool deegaannada ay maamusho.
Al-Shabaab oo gacanta ku haysa qaybo ka mid ah miyiga koonfurta iyo bartamaha Soomaaliya ayaa inta badan fulisa ciqaabo adag oo ka dhan ah dadka ay ku eedeyso inay la shaqeeyaan ciidamada dowladda ama saaxiibada caalamiga ah ee taageera howlaha la dagaallanka kooxda.
