Wararka24: Xiisad diblomaasiyadeed ayaa cirka isku shareertay kadib markii dowladda Itoobiya ay si adag u beenisay eedeymo uga yimid Sudan oo la xiriira weerarro diyaarado drone ah. Addis Ababa ayaa sheegtay in eedeymahaasi yihiin kuwo aan sal lahayn, isla markaana ay dhaawacayaan xiriirka taariikhiga ah ee labada dal.
Wasaaradda Arrimaha Dibadda Itoobiya ayaa bayaan ay soo saartay ku sheegtay in Sudan ay waddo olole siyaasadeed oo ka dhan ah madax-bannaanida iyo amniga Itoobiya. Dowladda Itoobiya waxay xustay inay muddo dheer ka gaabsatay inay si furan uga hadasho arrimaha la xiriira xadka labada dal, si loo ilaaliyo xiriirka shacabka labada dhinac.
Sudan ayaa hore u sheegtay in Itoobiya ay ogolaatay in dhulkeeda loo adeegsado weerarro ka dhacay gudaha Sudan, gaar ahaan kuwa loo adeegsaday diyaaradaha aan duuliyaha lahayn. Itoobiya ayaa arrintaasi si cad u beenisay, iyadoo sheegtay inaysan wax lug ah ku lahayn weerarradaas.
Dhanka kale, Addis Ababa ayaa eedeynta dib ugu celisay Sudan, iyadoo ku andacooneysa in ciidamada Sudan ay taageero siiyaan dagaalyahanno xiriir la leh TPLF, kuwaas oo ka howlgala meelaha ku dhow xadka galbeed ee Itoobiya. Itoobiya waxay sheegtay inay hayso xog muujineysa dhaqdhaqaaqyo hubeysan oo khatar ku ah amniga gudaha dalka.
Xiisaddan cusub ayaa kusoo aadeysa xilli Sudan ay wali ku jirto dagaal gudaha ah oo billowday sanadkii 2023, kaas oo sababay barakac ballaaran iyo burbur bani’aadamnimo. Itoobiya iyo Sudan ayaa sidoo kale muddo dheer isku hayay muranka dhulka Al-Fashaga.
Inkasta oo hadalka Itoobiya uu ahaa mid adag, haddana waxay ku baaqday xabbad-joojin degdeg ah iyo wada-hadal siyaasadeed oo lagu soo afjaro colaadda Sudan, si loo helo xasillooni waarta oo gobolka ah.
