Wararka24: Mucaaradka Soomaaliya ayaa sheegay inay weli ka tashanayaan ka qeyb-galka gogosha wadatashiga ee uu fidiyay Madaxweynaha Soomaaliya Xasan Sheekh Maxamud, xilli dalka uu galay marxalad siyaasadeed oo xasaasi ah oo la xiriirta doorashooyinka iyo muranka sharciyadda hay’adaha dowladda.
Cabdiraxmaan Dheere oo ka mid ah Golaha Mustaqbalka Soomaaliya ayaa sheegay in mucaaradka ay heleen casuumaadda rasmiga ah ee madaxtooyada, balse aysan weli gaarin go’aan kama dambeys ah oo ku saabsan inay ka qeyb-galaan kulanka lagu balansan yahay 10-ka May. Wuxuu xusay in arrintan ay u baahan tahay wadatashi dheeraad ah iyo qiimeyn siyaasadeed.
Mucaaradka ayaa muujiyay shaki ku saabsan daacadnimada dowladda ee ku aaddan gogosha wadahadalka, iyagoo tilmaamay in loo baahan yahay dammaanad siyaasadeed oo muujinaysa in kulankaasi uu noqon karo mid xal waara loga gaaro khilaafaadka taagan. Waxay sheegeen in kalsoonida labada dhinac ay tahay furaha guusha wada-hadallada.
Sidoo kale, Golaha Mustaqbalka ayaa maalmahan waday kulamo iyo wada tashiyo ay la yeesheen siyaasiyiin, odayaal dhaqameed iyo qaybaha bulshada, kuwaas oo diiradda lagu saarayay hannaanka doorashada iyo xaaladda siyaasadeed ee dalka. Mucaaradka ayaa la filayaa inay dhowaan soo bandhigaan aragtidooda ku aaddan nooca doorasho ee ay taageersan yihiin.
Dhanka kale, Madaxweyne Xasan Sheekh ayaa sheegay in gogosha uu fidiyay ay tahay mid lagu doonayo in lagu xalliyo arrimaha siyasada ee dalka, gaar ahaan doorashooyinka, dowlad-dhiska iyo midnimada qaranka. Waxaa hadda si weyn loo sugayaa go’aanka kama dambeyska ah ee mucaaradka iyo jihada uu qaadi doono wadahadalka siyaasadeed ee dalka.
