Wararka24: Turkiga ayaa ansixiyay deeq lacageed oo dhan 30 milyan oo dollar oo lagu taageerayo miisaaniyadda dowladda Soomaaliya, xilli labada dal ay sii xoojinayaan iskaashigooda istiraatiijiga ah ee dhinacyada dhaqaalaha iyo amniga.
Heshiiska ayaa dhigaya in lacagta lagu shubayo Bangiga Dhexe ee Soomaaliya oo kuyala laanta Ziraat Katılım Bankasi ee Muqdisho.
Deeqdan ayaa lagu tilmaamay taageero miisaaniyadeed oo muhiim ah oo ka caawinaysa Soomaaliya xoojinta dakhliga gudaha iyo dhismaha hay’adaha maaliyadeed, iyadoo dowladda looga baahan yahay inay soo gudbiso warbixinno joogto ah oo muujinaya isticmaalka lacagta.
Turkiga iyo Soomaaliya ayaa leh xiriir soo jireen ah oo sii xoogaystay tan iyo 2011, markii Ankara ay Muqdisho ka bilowday mashaariic horumarineed, tababar ciidan iyo dhismaha kaabayaasha bulshada.
Labada dal ayaa sidoo kale sii ballaarinaya iskaashi ku saabsan tamarta iyo amniga badda, iyadoo Turkigu uu bilaabay howlgallo sahamin shidaal oo ka socda xeebaha Soomaaliya.
Sanadihii dambe Turkiga ayaa Soomaaliya u diray maraakiib cilmi-baaris shidaal sida Oruç Reis, taas oo muujisay sida Ankara ay u danaynayso kheyraadka dabiiciga ah ee dalka iyo xoojinta xiriirka istiraatiijiga ah.
Xukuumadaha labada dal ayaa la filayaa in ay sii xoojiyaan iskaashiga dhaqaalaha, difaaca iyo tamarta, iyadoo heshiiskan cusub uu kor u qaadayo kalsoonida iyo wada shaqeynta labada dhinac.
Warbixintan ayaa imaanaysa xilli Soomaaliya ay isku dayayso in ay xoojiso miisaaniyaddeeda iyo soo jiidashada maalgashi dibadeed, iyadoo taageerada Turkiga loo arko mid muhiim u ah xasilloonida dhaqaale ee dalka.
Mas’uuliyiin ka tirsan Ankara iyo Muqdisho ayaa sheegay in deeqdan ay qayb ka tahay ballanqaadyo ballaaran oo lagu taageerayo horumarinta Soomaaliya, isla markaana lagu adkeynayo iskaashiga muddada dheer ee labada dowladood. Waxaa la filayaa in lacagta ugu horreysa la sii daayo bilaha soo socda.
