Maamulka madaxweyne Donald Trump ayaa wajahaya cadaadis sharci iyo mid siyaasadeed kadib markii uu gaaray waqtigii kama dambaysta ahaa ee Sharciga Awoodaha Dagaalka ee Mareykanka, kaas oo ku waajibinaya inuu fasax ka helo Congress-ka haddii hawlgal militari uu dhaafo 60 maalmood.
Wasirka gashandiga Pete Hegseth ayaa sheegay in xabbad-joojinta hadda u dhexeysa Mareykanka iyo Iran ay hakisay tirinta muddadaas, taasoo maamulka Trump u arko in dagaalkii si ku-meel-gaar ah u joogsaday. Arrintan ayaa dhalisay dood sharciyeed oo xooggan gudaha Washington.
Xildhibaannada mucaaradka iyo khubarada sharciga ayaa si adag uga horyimid fasiraaddan, iyagoo ku doodaya in sharcigu aanu oggolaanayn in waqtiga la hakiyo marka dagaal si rasmi ah u billowdo. Waxay sheegeen in Aqalka Cad looga baahan yahay oggolaansho rasmi ah haddii uu doonayo inuu sii wado hawlgal kasta oo militari.
Khilaafkan cusub ayaa kusoo beegmaya xilli wada-hadallada xabbad joojinta ay weli yihiin kuwo qalqal galay, halka Madaxweyne Trump uu marar badan ka digay in weerarrada dib loo bilaabi karo haddii wada-xaajoodyadu fashilmaan.
Dhinaca kale, Golaha Senate-ka ayaa mar kale diiday qaraar lagu xaddidayay awoodda Trump ee dagaalka Iiraan, taasoo muujisay kala qeybsanaan xooggan oo ka dhex jirta siyaasadda Mareykanka ee ku aaddan colaaddan.
Xiisadda u dhexeysa Washington iyo Tehran ayaa weli taagan, iyadoo khubaradu ka digayaan in haddii dadaallada diblomaasiyadeed ay fashilmaan, dagaalku dib u qarxi karo, taas oo saameyn weyn ku yeelan karta amniga gobolka iyo dhaqaalaha caalamka.
