Wararka24: Guddiga Madaxbannaan ee Doorashooyinka Qaranka iyo Soohdimaha ayaa si adag uga horyimid magacaabistii uu shalay sameeyay Guddoomiyaha Gobolka Banaadir, iyagoo sheegay in tallaabo kasta oo ka hor imaaneysa dastuurka iyo sharciga doorashooyinka aysan sharci ahayn.
Guddiga ayaa sheegay in golayaasha deegaanka ee kasoo baxay doorashadii 25-ka December 2025, lana dhaariyay 2-dii April 2026, ay yihiin golayaal rasmi ah oo sharciyeysan, islamarkaana ay u harsan tahay oo keliya inay iska dhex doortaan guddoomiyeyaashooda iyo ku-xigeennadooda.
Waxay caddeeyeen in guddoomiyeyaasha degmooyinka ee hadda xilka haya ay ku jiraan marxalad xil wareejin ah, mas’uuliyaddooduna ku egtahay inta laga soo dooranayo hoggaanka cusub ee degmooyinka.
Hadalkan ayaa yimid kadib markii Guddoomiyaha Gobolka Banaadir, Xasan Maxamed Xuseen Muungaab, uu guddoomiye cusub u magacaabay degmada Dayniile(Abdirahman Moalim Hussein) tallaabadaas oo dhalisay dood siyaasadeed iyo mid sharci.
Guddiga doorashooyinka ayaa ku adkeystay in dhismaha maamulada degmooyinka Banaadir lagu dhammeystiri doono hab waafaqsan sharciga, iyagoo uga digay cid kasta oo isku dayda inay faragelin ku sameyso hannaankaas.
