Wararka24: Laba nin oo ka tirsan bulshada Yuhuudda ayaa lagu dhaawacay weerar mindi loo adeegsaday oo ka dhacay deegaanka Golders Green ee waqooyiga London, iyadoo booliska magaalada ay si rasmi ah ugu tilmaameen dhacdadaas weerar argagixiso. Weerarka ayaa yimid xilli walaac amni uu ka jiray xaafadaha ay deggen yihiin bulshada Yuhuudda.
Booliska Metropolitan Police ayaa sheegay inay gacanta ku dhigeen nin 45 jir ah oo lagu tuhunsan yahay falkaasi, kadib markii uu sidoo kale isku dayay inuu weeraro saraakiil amni oo goobta tegay. Labada qof ee dhaawacmay oo da’doodu kala tahay 76 iyo 34 jir ayaa la geeyay isbitaalka, iyadoo xaaladdooda lagu sheegay mid deggan.
Taliyaha booliska London Mark Rowley ayaa sheegay in eedeysanaha uu leeyahay taariikh hore oo la xiriirta falal rabshado wata iyo xaalado dhanka caafimaadka maskaxda ah, balse baaritaannadu ay weli socdaan si loo ogaado sababta rasmiga ah ee ka dambeysa weerarka.
Ra’iisul Wasaaraha Britain Keir Starmer, Boqor Charles III iyo Duqa London Sadiq Khan ayaa si adag u cambaareeyay dhacdada, iyagoo sheegay in weerar kasta oo lagu bartilmaameedsado bulsho gaar ah uu khatar ku yahay wadajirka bulshada Britain.
Dhacdadan ayaa kusoo aadeysa xilli weeraro kale oo ka dhan ah xarumaha Yuhuudda ay dhowaan ka dhaceen London, taasoo sare u qaaday cabsi amni iyo baaqyo lagu xoojinayo ilaalinta goobaha bulshadaasi ku badan tahay.
