Wararka24: Wasiirka Arrimaha Dibadda iyo Iskaashiga Caalamiga ee Jamhuuriyadda Federaalka Soomaaliya, Cabdisalaan Cabdi Cali, ayaa magaalada Muscat kulan kula yeeshay Wasiirka Gaadiidka, Isgaarsiinta iyo Tiknoolajiyadda Macluumaadka ee dalka Oman, Said bin Hamoud Al Maawali.
Kulankan ayaa diiradda lagu saaray sidii loo xoojin lahaa iskaashiga labada dal ee dhinacyada gaadiidka, isgaarsiinta iyo tiknoolajiyadda macluumaadka, si loo horumariyo isku xirnaanta iyo kobcinta kaabeyaasha dhaqaalaha.
Labada dhinac ayaa isla soo qaaday muhiimadda ay leedahay taageeridda isbeddelka dhijitaalka ah ee Soomaaliya, iyadoo la dardargelinayo qorshayaasha la xiriira horumarinta adeegyada casriga ah iyo kobcinta xiriirka ganacsi ee gobolka.
Wasiirradu waxay sidoo kale ka wada hadleen xoojinta wada-shaqeynta hay’adaha dowladda iyo fududeynta ka qaybgalka ganacsiga gaarka loo leeyahay, si loo abuuro fursado dhaqaale iyo iskaashi farsamo oo waxtar leh.
Kulanka ayaa qeyb ka ah dadaallada ay Soomaaliya ku dooneyso inay xoojiso xiriirka diblomaasiyadeed iyo iskaashiga dhaqaale ee kala dhexeeya dalalka gobolka, gaar ahaan kuwa Khaliijka oo door muhiim ah ka ciyaara maalgashiga iyo ganacsiga.
Dowladda Soomaaliya ayaa dadaal ugu jirta inay hirgeliso qorsheyaal lagu horumarinayo kaabeyaasha gaadiidka, isgaarsiinta iyo adeegyada tiknoolajiyadda, si dalka loogu beddelo xarun ganacsi iyo isku xirnaan heer gobol ah.
Kulankan Muscat ayaa la filayaa inuu horseedo heshiisyo iyo wada-shaqeyn cusub oo kor u qaadi kara horumarka dhaqaale iyo dhijitaalka ee Soomaaliya, iyadoo la xoojinayo xiriirka saaxiibtinimo ee labada dal.
