Wararka24: Golaha Wasiirrada ee dowladda Israel ayaa si rasmi ah u ansixiyay magacaabista Michael Lotem, kaas oo noqonaya safiirkii ugu horreeyay ee Israel u qaabilsan Somaliland, kadib soo jeedin uu gudbiyay Wasiirka Arrimaha Dibadda Gideon Sa’ar. Go’aankan ayaa lagu shaaciyay kulan golaha wasiirradu yeesheen Axaddii.
Michael Lotem, oo horey u ahaa ergeyga dhaqaalaha ee Israel u qaabilsan Afrika, ayaa shaqadiisa cusub u gudan doona qaab aan deggenaansho rasmi ah lahayn (non-resident), sida ay xaqiijisay Wasaaradda Arrimaha Dibadda ee Israel. Lotem wuxuu horey safiir uga soo noqday dalal ay ka mid yihiin Kenya, Azerbaijan iyo Kazakhstan.
Magacaabistan ayaa daba socota xiriir diblomaasiyadeed oo dhexmaray Israel iyo Somaliland bishii Diseembar 2025, markaas oo Israel noqotay dalkii ugu horreeyay ee si rasmi ah u aqoonsada Somaliland tan iyo markii ay ku dhawaaqday inay ka go’day Soomaaliya sanadkii 1991-kii. Heshiiskaasi wuxuu dhigayay in labada dhinac ay is dhaafsadaan safiirro iyo safaarado rasmi ah.
Dowladda Federaalka Soomaaliya ayaa si kulul uga hortimid tallaabadan, iyadoo ku adkaysanaysa in Somaliland ay weli ka tirsan tahay dhulka Soomaaliya, islamarkaana xiriir kasta oo diblomaasiyadeed oo lala yeesho uu yahay xadgudub ka dhan ah madax-bannaanida dalka.
Sidoo kale, arrintan ayaa dhalisay falcelin xooggan oo ka timid qaar ka mid ah dalalka Afrika iyo dunida Carabta, kuwaas oo sheegay in tallaabadaasi ay dhaawici karto midnimada dhuleed ee Soomaaliya.
Goobta istiraatiijiga ah ee Somaliland oo ku taalla Gulf of Aden ayaa ka dhigaysa meel muhiim u ah isu-socodka maraakiibta iyo amniga gobolka, gaar ahaan xilligan ay sii kordhayaan xiisadaha ka jira Badda Cas iyo Yemen.
Magacaabistan ayaa loo arkaa tallaabo cusub oo sii xoojin karta xiriirka siyaasadeed iyo amni ee u dhexeeya Israel iyo Somaliland, iyadoo saameyn ku yeelan karta xaaladda diblomaasiyadeed ee Geeska Afrika.
