Wararka24: Madaxweynihii hore ee Soomaaliya Sheekh Shariif Sheekh Axmed ayaa si adag uga digay in dalka laga hirgeliyo doorasho hal dhinac ah, isagoo ku baaqay in xal siyaasadeed lagu gaaro wadatashi qaran iyo heshiis ballaaran.
Sheekh Shariif oo warbaahinta kula hadlay magaalada Muqdisho ayaa sheegay in xaaladda siyaasadeed ee dalka ay tahay mid xasaasi ah, una baahan in si dhab ah loo wajaho, isagoo dhaliilay tallaabooyinka ay qaadayso dowladda federaalka.
Wuxuu carrabka ku adkeeyay in aan xukun lagu sii hayn karin awood iyo muddo kororsi, balse ay muhiim tahay in la tixgeliyo go’aan wadajir ah oo ay ku mideysan yihiin dhammaan dhinacyada siyaasadda iyo bulshada.
“Ma jiri karto in qof keligiis uu yiraahdo waan sii joogayaa ilaa 2027, taasina waa wax aan la aqbali karin,” ayuu yiri Sheekh Shariif, isagoo ka digay in khilaafka hadda jira uu halis gelin karo xasilloonida dalka.
Sidoo kale, wuxuu sheegay in doorasho aan heshiis lagu ahayn ay keeni karto kala qaybsanaan iyo dib u dhac ku yimaada dowladnimada Soomaaliya, isaga oo ku tilmaamay in “doorasho been ah” aysan socon doonin.
Dhanka kale, Sheekh Shariif ayaa ka hadlay xaaladda magaalada Baydhabo, isagoo xusay in isbeddellada ka dhacay halkaasi ay abuureen su’aalo ku saabsan sida ay wax u dhaceen iyo dareenka shacabka deegaanka.
Ugu dambeyn, madaxweynihii hore ayaa ku adkeystay in wadatashi qaran uu yahay waddada kaliya ee looga bixi karo xiisadda siyaasadeed ee dalka, isagoo uga digay dhinacyada siyaasadda inay ka fogaadaan tallaabo kasta oo keeni karta kala fogaansho iyo amni darro.
