Wararka24: Bankiga Adduunka ayaa walaac ka muujiyay xaaladda siyaasadeed ee Soomaaliya, gaar ahaan khilaafka u dhexeeya dowladda federaalka iyo maamul goboleedyada.
Ilo xog ogaal ah ayaa sheegaya in haddii aan xal laga gaarin ismari waaga siyaasadeed, ay jirto suuragalnimo ah in la hakiyo ama la jaro taageerada dhaqaale ee la siiyo dowladda.
Wararka ayaa tilmaamaya in kahor bisha May la filayo in go’aan laga gaaro arrintan, haddii aan la helin heshiis siyaasadeed oo ku saabsan doorashooyinka.
Beesha caalamka ayaa cadaadis saaraysa in la helo hannaan doorasho oo lagu wada qanacsan yahay, iyadoo arrintan ay si toos ah u saameyn karto dhaqaalaha dalka.
Hakinta taageeradan ayaa halis gelin karta xasilloonida dhaqaale, maadaama Bankiga Adduunka uu sanad walba Soomaaliya siiyo taageero lacageed oo muhiim ah.
Qaar kamid ah maamul goboleedyada ayaa lagu sheegay inay riixayaan tallaabadan, iyagoo ku doodaya in loo baahan yahay heshiis siyaasadeed oo loo dhan yahay.
Taageerada Bankiga Adduunka ayaa ku xiran shuruudo siyaasadeed iyo kuwo dhaqaale, waxaana horey loo hakiyay xilligii khilaafkii doorashooyinka ee 2021.
