Wararka24: Faah faahinno kala duwan ayaa kasoo baxaya duqeyn culus oo xalay ka dhacday duleedka magaalada Baydhaba ee gobolka Baay, taas oo lala beegsaday maleeshiyaad ka tirsan Al Shabaab.
Duqeynta ayaa si gaar ah uga dhacday inta u dhexeysa Baydhaba iyo deegaanka Daynuunaay, halkaas oo la sheegay in ay isku uruursanayeen xubno ka tirsan kooxda.
Wararka ayaa sheegaya in diyaarado dagaal oo ay leeyihiin saaxiibada caalamiga ah ay fuliyeen weerarka, iyagoo dhowr gantaal ku dhuftay goobta la beegsaday.
Ujeedka maleeshiyaadka ayaa la sheegay inuu ahaa inay carqaladeeyaan amniga Baydhaba, balse weerarka ayaa yimid kadib markii la helay xog ku saabsan dhaq dhaqaaqooda.
Sidoo kale, waxaa jira warar sheegaya in khasaare culus uu soo gaaray kooxda, inkastoo aan weli si rasmi ah loo xaqiijin tirada dhimashada iyo dhaawaca.
Xaaladda deegaanka ayaa weli kacsan, iyadoo ciidamada dowladda ay dhaq dhaqaaqyo ka wadaan duleedka magaalada si loo xoojiyo amniga.
Duqeyntan ayaa kusoo aadeysa xilli maalmihii u dambeeyay ay jireen dagaallo ka dhacay deegaanka Daynuunaay, halkaas oo ay isku farasaareen ciidamada dowladda iyo Al Shabaab.
