Hoggaamiyaha KMG ah ee Koonfur Galbeed, Jibriil Cabdirashiid Xaaji, ayaa maanta gaaray magaalada Baydhabo, isagoo shaaciyay qorshihiisa ku aaddan hoggaanka maamulka iyo xasilinta deegaannada.
Jibriil ayaa sheegay in mudnaantiisa koowaad ay tahay sugidda amniga, gaar ahaan Baydhabo, isagoo xusay in amniga uu saldhig u yahay horumarka iyo dib u dhiska maamulka.
Wuxuu sidoo kale ballanqaaday in uusan jiri doonin beegsi gaar ah, isla markaana la sameyn doono dib u heshiisiin dhab ah oo lagu xallinayo khilaafaadka ka jira deegaannada Koonfur Galbeed.
“Dib u heshiisiin dhab ah ayaan ka sameyn doonnaa deegaannada maamulka, mana jiri doonto cid si gaar ah loo beegsado,” ayuu yiri Jibriil.
Hoggaamiyaha KMG ah ayaa sheegay inuu la shaqeyn doono dhammaan qeybaha bulshada, oo ay ku jiraan odayaasha dhaqanka, haweenka, dhalinyarada iyo culimada, si loo helo maamul loo dhan yahay.
Sidoo kale, wuxuu faray shaqaalaha hay’adaha maamulka inay sii wadaan adeegyada bulshada, isagoo carrabka ku adkeeyay in isbeddelka hoggaanka uusan saameyn ku yeelan doonin howlaha socda.
Jibriil ayaa intaas ku daray in maamulka uu diiradda saari doono horumarinta adeegyada aas-aasiga ah iyo kaabeyaasha dhaqaalaha ee Koonfur Galbeed.
Magacaabistiisa ayaa timid kadib isbeddello siyaasadeed oo ka dhacay Baydhabo, waxaana si adag uga horyimid Golaha Mustaqbalka oo ku baaqay in la qabto doorasho loo dhan yahay.
