Wararka24: Wararka laga helayo gobolka Baay ayaa sheegaya in dhaqdhaqaaqyo ciidan oo xooggan ay ka socdaan duleedka magaalada Baydhaba, halkaas oo ciidamada Dowladda Federaalka Soomaaliya ay ku sugan yihiin.
Ciidamadan ayaa la sheegay inay fadhiisin ka sameysteen meel dhowr kiiloomitir u jirta magaalada, iyagoo u muuqda kuwo isku diyaarinaya inay gudaha u galaan Baydhaba.
Sidoo kale, waxaa cirka magaalada iyo nawaaxigeeda lagu arkayaa diyaarado nooca drones ah iyo kuwa qumaatiga u kaca, kuwaas oo dul heehaabaya aagga, isla markaana qayb ka ah howlgalka socda.
Dad badan oo ku nool Baydhaba ayaa bilaabay inay ka barakacaan magaalada, iyagoo ka cabsi qaba in dagaal toos ah uu ka dhex qarxo labada dhinac.
Dhaqdhaqaaqyadan ayaa kusoo aadaya xilli Wasiirka Dekedaha Soomaaliya uu sheegay in ciidamada dowladda la filayo inay gudaha u galaan Baydhaba.
Dhanka kale, dagaallo hore ayaa ka dhacay deegaanka Daynuunaay oo qiyaastii 18 kiiloomitir u jirta Baydhaba, halkaas oo ay isku fara saareen ciidamada dowladda iyo Al Shabaab.
Xiisadda u dhexeysa Dowladda Federaalka Soomaaliya iyo maamulka Koonfur Galbeed ayaa weli sii xoogeysaneysa, iyadoo isku socodka gaadiidka iyo dadka ee magaalada si weyn u yaraaday.
