Wararka24: Agaasimihii hore ee hay’adda NISA Fahad Yaasiin Xaaji Daahir ayaa si kulul uga hadlay xabsi guriga la geliyay Taliyihii hore ee Ciidanka Asluubta Jeneraal Mahad Cabdiraxmaan Shub.
Fahad Yaasiin ayaa farriin uu soo saaray ugu digay Madaxweynaha Soomaaliya Xasan Sheekh Maxamuud iyo Ra’iisul Wasaare Xamza Cabdi Barre in ay ka fiirsadaan tallaabadaasi, isaga oo ku tilmaamay mid abuuri karta dhaqan cusub oo khatar ku ah nidaamka dowladnimada.
Wuxuu sheegay in aan horey loo arag masuul xil laga qaaday oo si toos ah xabsi loogu beddelo, isagoo arrintaas ku tilmaamay mid aan horay uga dhicin siyaasadda dalka.
Fahad ayaa ugu baaqay madaxda sare inay si degdeg ah u sii daayaan Jeneraal Shub, isaga oo ka digay cawaaqib ka dhalan kara haddii tallaabadan la sii wado.
“Albaabkan haddii la furo lama yaqaano halka uu ku dambeyn doono,” ayuu yiri Fahad, isagoo muujiyay walaac ku aaddan mustaqbalka nidaamka siyaasadeed.
Jeneraal Mahad Cabdiraxmaan Shub ayaa haatan ku jira xabsi guri, iyadoo ciidamada ammaanka ay si buuxda ula wareegeen ilaalinta hoygiisa, isla markaana la xaddiday dhaqdhaqaaqiisa.
Ilo wareedyo ayaa sheegaya in tallaabadan ay ka dambeyso amar sare, inkastoo aan si rasmi ah loo shaacin sababta, iyadoo la tuhunsan yahay inay la xiriirto xiisadda siyaasadeed ee ka taagan Koonfur Galbeed.
