Wararka24: Xiisad cusub ayaa ka taagan dalka Ciraaq kadib weerarro iyo duqeymo isdaba joog ah oo u dhexeeya ciidamada Mareykanka iyo xoogagga gudaha dalkaasi, taasoo sare u qaaday walaaca laga qabo amniga gobolka.
Wararka ayaa sheegaya in Mareykanka uu duqeymo ka fuliyay deegaanno ay ku sugnaayeen ciidamada PMF, kuwaas oo ah xoogag hubeysan oo taageero ka hela dowladda Ciraaq, iyadoo la sheegay in khasaare dhimasho iyo dhaawacba uu ka dhashay.
Dhanka kale, dowladda Ciraaq ayaa la sheegay inay oggolaatay in ciidamada PMF ay qaadaan tallaabooyin is difaac ah, arrintaas oo horseedday in dagaallo toos ah ay ka dhacaan goobaha qaar.
Weerarro ayaa sidoo kale lagu qaaday saldhigyo la xiriira Mareykanka, waxaana jira cabsi ah in xiisaddan ay ku fidi karto dalalka deriska ah, gaar ahaan gudaha Suuriya.
Khubarada amniga ayaa ka digaya in xaaladdan ay sii murjin karto xasilloonida gobolka, isla markaana ay sababi karto isku dhac ballaaran oo saameyn ku yeesha dalal badan.
Si kastaba, ma jiraan weli warar si madax bannaan loo xaqiijiyay oo caddeynaya dhammaan faahfaahinta dhacdooyinkan, iyadoo xaaladdu weli tahay mid is bedbeddelaysa.
