Wararka24: Madaxweynihii hore ee Soomaaliya Maxamed Cabdullahi Maxamed Farmaajo ayaa walaac xooggan ka muujiyay xaaladda sii cakirmeysa ee ka taagan deegaannada Koonfur Galbeed, iyadoo uu kasii darayo khilaafka u dhexeeya Muqdisho iyo Baydhaba.
Farmaajo ayaa ka digay halista ka dhalan karta waxa uu ku tilmaamay qorshe dhiillo wata oo ay wado Dowladda Federaalka Soomaaliya, isagoo sheegay in xaaladdu ay khatar ku tahay xasilloonida deegaanka iyo badqabka shacabka.
Wuxuu sidoo kale tilmaamay in xiisaddan ay wiiqi karto dadaallada dowlad dhiska iyo geeddi socodka siyaasadeed ee dalka, haddii aan si degdeg ah xal loogu helin.
Madaxweynihii hore ayaa xusay in weli ay jiraan fursado lagu dejin karo xaaladda, haddii dowladda federaalka ay muujiso niyad wanaag islamarkaana ay furto wadahadal dhab ah oo ku saabsan arrimaha doorashooyinka.
Farmaajo ayaa horay u taageeray madaxweyne Cabdicasiis Laftagareen, isagoo sidoo kale ka digay in dalka uu geli karo qalalaase siyaasadeed iyo firaaq dastuuri ah haddii aan la gaarin heshiis qaran.
Wuxuu carrabka ku adkeeyay in loo baahan yahay is afgarad siyaasadeed oo ballaaran ka hor dhammaadka muddada xilka madaxweyne Xasan Sheekh Maxamuud ee ku eg 15 May 2026.
Soomaaliya ayaa haatan wajahaysa marxalad siyaasadeed oo xasaasi ah, iyadoo ay is biirsadeen xiisado siyaasadeed iyo xaalado bani aadannimo oo saameyn ku leh dalka.
