Wararka24: Dowladda Federaalka Soomaaliya ayaa saraakiil sare u dirtay magaalada Baraawe ee gobolka Shabeellaha Hoose, iyadoo sii xoojineysa dhaqdhaqaaqyada ciidan ee ka socda Koonfur Galbeed.
Wafdi uu hoggaaminayo Taliyaha Ciidanka Haramcad Dhamme Cabdixakiin Siciid Ceeldheer ayaa gaaray Baraawe, halkaas oo si diiran loogu soo dhaweeyay kadib markii ay horey u tageen ciidamo ka tirsan Haramcad.
Qoraal kasoo baxay taliska ayaa lagu sheegay in safarka taliyaha uu la xiriira dardargelinta howlaha amniga iyo xoojinta howlgalada ka socda gobolka.
Taliyaha ayaa kormeer ku tagay xarunta cusub ee ciidanka Haramcad ee Baraawe, isagoo kulan la qaatay saraakiisha iyo cutubyada halkaasi ku sugan.
Intii uu halkaasi joogay, wuxuu salaan ka qaatay ciidamo, wuxuuna ku adkeeyay feejignaan joogto ah iyo dardargelinta howlaha lagu sugayo amniga magaalada iyo deegaannada ku xeeran.
Ciidamadan ayaa horay loo geeyay Baraawe, kadib markii ciidamada Koonfur Galbeed ay ka baxeen magaalada, iyadoo warar ay sheegayaan in qaar ka mid ah ay u dhaqaaqeen dhinaca Kismaayo.
Xiisadda u dhexeysa Dowladda Federaalka iyo Koonfur Galbeed ayaa sii kacsan, iyadoo labada dhinac ay wadaan dhaqdhaqaaqyo iska soo horjeeda oo laga cabsi qabo inay horseedaan isku dhacyo hor leh.
