Wararka24: Xildhibaanno ka tirsan Baarlamaanka Federaalka Soomaaliya oo matala Puntland, Jubbaland iyo Koonfur Galbeed ayaa kulamo siyaasadeed ku leh magaalada Nairobi, iyagoo ka tashanaya mideynta mowqifyadooda.
Wararka laga helayo kulamadan ayaa sheegaya in diiradda lagu saarayo xoojinta wada shaqeynta iyo sidii loo yeelan lahaa mowqif mideysan oo ku aaddan khilaafaadka siyaasadeed ee dalka.
Xildhibaanada ayaa sidoo kale ka wada hadlay xaaladda guud ee Soomaaliya, gaar ahaan muranka u dhexeeya dowladda federaalka iyo dowlad goboleedyada, iyo xiisadda ka taagan Koonfur Galbeed.
Qaar ka mid ah mudaneyaasha ayaa sheegay in kulamadan loogu qabtay Nairobi sababo la xiriira duruufaha siyaasadeed ee gudaha, oo ay ku jiraan caqabado ka jira socdaalka iyo amniga.
Waxaa la filayaa in shirka lagu gorfeynayo sidii loo dhisi lahaa iskaashi siyaasadeed oo waqti dheer ah, isla markaana si wadajir ah looga jawaabo arrimaha doorashooyinka iyo dastuurka.
Kulamadan ayaa kusoo aadaya xilli ay sii kordhayaan khilaafaadka siyaasadeed ee dalka, iyadoo ay jiraan aragtiyo kala duwan oo ku saabsan hannaanka doorashooyinka.
Dowladda Federaalka ayaa dhankeeda sheegtay in dalka uu galay marxalad cusub oo ku wajahan doorashooyin qof iyo cod ah, taasoo ay ku tilmaantay mid loo dhan yahay.
Falanqeeyayaal ayaa aaminsan in haddii kulamadan ay soo saaraan mowqif mideysan, ay saameyn ku yeelan karaan doodaha siyaasadeed ee socda.
