Wararka24: 7-02-2026 Roobab mahiigaan ah oo tan iyo shalay ka da’ayay magaalada Nairobi ee caasimadda dalka Kenya ayaa sababay khasaare dhimasho, dhaawac iyo burbur hantiyeed, sida ay sheegeen wararka laga helayo halkaasi.
Booliska Kenya ayaa xaqiijiyay in ugu yaraan 10 qof ay ku dhinteen daadadka iyo shilal kale oo ka dhashay roobabka xooggan.
Qaar ka mid ah dadka dhintay ayaa daadadku qaadeen, halka kuwo kale ay ku dhinteen koronto ay saameeyeen biyaha roobka.
Roobabka ayaa sababay in waddooyin badan ay xirmaan, halka xaafado badan oo magaalada ka tirsan ay biyuhu galeen, taas oo adkeyneysa howlaha gurmadka iyo samatabixinta.
Xaafadda Islii oo ay ku badan yihiin dadka Soomaaliyeed ayaa ka mid ah meelaha ay xaaladdu saameysay, inkastoo illaa hadda aan laga soo sheegin wax dhimasho ah oo halkaas ka dhacday.
Ciidamada milatariga Kenya ayaa ka qayb qaadanaya howlaha gurmadka, iyagoo adeegsanaya gaadiid culus si ay uga daad-gureeyaan dadka ku go’doonsan meelaha ay biyuhu galeen.
Hay’adda Laanqeyrta Cas ee Kenya ayaa sidoo kale ka digtay halista ka iman karta roobabka sii socda, waxayna shacabka ugu baaqday inay ka fogaadaan meelaha ay daadadku halista ka yihiin.
