Wararka24: Wasaaradda Arrimaha Gudaha, Federaalka iyo Dib-u-heshiisiinta ee Dowladda Federaalka Soomaaliya (DFS) ayaa sheegtay inay si dhow ula socoto xaaladaha ka soo cusboonaaday deegaannada Dowlad-Goboleedka Koonfur Galbeed, iyadoo muujisay walaac ku saabsan caqabado siyaasadeed iyo kuwo amni oo ka jira qaar ka mid ah deegaannadaas.
War-saxaafadeedka wasaaradda ayaa lagu bogaadiyay doorka shacabka iyo maamulka Koonfur Galbeed ee ilaalinta midnimada dalka iyo dowladnimada, iyo ka qeybqaadashadooda hannaanka dib u eegista iyo dhameystirka dastuurka.
Sidoo kale, DFS ayaa sheegtay in aysan wax lug ah ku lahayn xasillooni darrada jirta, isla markaana ay ka shaqeynayso in la joojiyo colaadaha lana xalliyo khilaafaadka jira iyada oo loo marayo wadahadal.
Wasaaradda ayaa sidoo kale cambaareysay go’aan ka soo baxay madaxtooyada Koonfur Galbeed oo lagu sheegay in la hakiyay wadashaqeyntii kala dhaxaysay DFS, iyadoo caddeysay in hay’adaha dowladda federaalka ay weli gudanayaan waajibaadkooda dastuuriga ah ee ku aaddan adeegga shacabka ku nool deegaannadaas.
Ugu dambeyn, DFS ayaa ugu baaqday maamulka Koonfur Galbeed inay sii wadaan ka qeybqaadashada geeddi-socodka dib u heshiisiinta iyo dimuqraadiyeynta dalka, iyadoo sidoo kale ugu baaqday bulshada iyo siyaasiyiinta deegaanka inay ka feejignaadaan wax kasta oo halis gelin kara amniga iyo xasilloonida shacabka.
