Wararka24: Dalal dhowr ah oo Carbeed ayaa maamulka Madaxweynaha Mareykanka Donald Trump ka codsaday in la furo wadahadallo diblomaasiyadeed oo lagu soo afjarayo dagaalka Iiraan, balse Aqalka Cad ayaa la sheegay inuu diiday dadaalladaas.
Sida ay sheegtay wakaaladda wararka ee Reuters, dowladaha gobolka qaarkood ayaa isku dayay inay dhexdhexaadiyaan colaadda, hase yeeshee maamulka Washington ayaa diiradda saaraya sii wadista hawlgallada militari.
Dhinaca kale, saraakiil ka tirsan xukuumadda Iiraan ayaa sheegay in Tehran aysan aqbali doonin wax xabad-joojin ah inta ay socdaan duqeymaha lagu beegsanayo gudaha dalkaas.
Dagaalka oo galay toddobaadkii saddexaad ayaa sababay khasaare dhimasho iyo dhaawac leh, wuxuuna sidoo kale si weyn u saameeyay suuqyada tamarta ee caalamka, gaar ahaan kadib markii marinka muhiimka ah ee Hormuz uu wajahayo xannibaad iyo weeraro.
Wararka ayaa sidoo kale sheegaya in Mareykanka uu duqeymo la beegsaday Jasiiradda Kharg, oo ah goobta ugu weyn ee Iiraan ay ka dhoofiso saliidda, halka hoggaanka cusub ee Tehran uu ku hanjabay in marinka Hormuz uu sii xirnaan doono.
Qaar ka mid ah dalalka gobolka, oo ay ku jiraan Cumaan iyo Masar, ayaa hore u isku dayay inay dib u bilaabaan wada-hadallo lagu dejinayo xiisadda, balse ilaa hadda wax horumar ah lama sheegin.
