Wararka24: Xoghayaha Arrimaha Dibadda ee Maraykanka Marco Rubio ayaa khadka telefoonka kula hadlay Ra’iisul Wasaaraha Itoobiya Abiy Ahmed, iyagoo ka wada hadlay xasilloonida iyo amniga gobolka Geeska Afrika.
War-saxaafadeed kasoo baxay Waaxda Arrimaha Dibadda Maraykanka ayaa lagu sheegay in labada dhinac ay diiradda saareen iskaashiga ku saabsan xasilloonida gobolka, la-dagaallanka argagixisada, horumarinta dhaqaalaha iyo dhisidda saldhig amni oo waara oo mustaqbalka fog ka hirgala Geeska Afrika.
Qoraalka oo uu saxiixay afhayeen ku-xigeenka koowaad ee Waaxda Arrimaha Dibadda, Tommy Pigott, ayaa sheegay in wada-hadalku uu qeyb ka yahay dadaallada lagu xoojinayo iskaashiga amni ee u dhexeeya Maraykanka iyo Itoobiya, gaar ahaan arrimaha mudnaanta u leh gobolka.
War-saxaafadeedka ayaa ahaa mid kooban, mana bixin faahfaahin dheeraad ah oo ku saabsan heshiisyo gaar ah ama tallaabooyin cusub oo labada dhinac ka gaareen wada-hadalkooda.
Wicitaankan ayaa kusoo beegmaya xilli taliyaha cusub ee Taliska Ciidamada Maraykanka ee Afrika (AFRICOM) Dagvin Anderson uu dhowaan socdaal ku maray qaar ka mid ah dalalka iyo deegaannada Geeska Afrika, si loo xoojiyo wada-shaqeynta amni iyo dadaallada la-dagaallanka kooxaha xagjirka ah sida Al-Shabaab iyo Daacish.
