Wararka24:6-02-2026 Madaxweynaha Mareykanka Donald Trump ayaa Khamiistii xilkii ka qaaday Xoghayihii Waaxda Amniga Gudaha (DHS) Kristi Noem, kadib dhaliilo siyaasadeed oo la xiriiray qaabka ay u maamushay waaxdaasi, gaar ahaan arrimaha socdaalka iyo ka jawaabidda musiibooyinka dabiiciga ah.
Trump ayaa go’aanka xil-ka-qaadista ku shaaciyay baraha bulshada, isagoo sheegay inuu xilkaas u magacaabayo Senator Markwayne Mullin oo ka tirsan xisbiga Jamhuuriga kana soo jeeda gobolka Oklahoma.
Madaxweynaha ayaa sidoo kale sheegay in Kristi Noem loo magacaabi doono xil cusub oo ah Ergeyga Gaarka ah ee Gaashaanka Qaaradaha Ameerika, oo ah qorshe amni oo uu sheegay inuu diiradda saari doono dalalka ku yaalla galbeedka qaaradda.
Xilka ka qaadista Noem ayaa timid laba maalmood kadib markii ay su’aalo adag kala kulantay xubnaha Koongareeska Mareykanka intii lagu jiray dhageysi ku saabsan maamulka waaxda Amniga Gudaha.
Dhaliilaha ugu waaweyn ee loo jeediyay waxaa ka mid ahaa olole xayeysiis ah oo ku kacay 220 milyan oo doolar oo lagu dhiirrigelinayay dadka sida sharci darrada ah ku jooga Mareykanka inay si iskood ah dalka uga baxaan. Noem ayaa sheegtay in Trump uu ogaa ololahan, balse Trump ayaa si cad u beeniyay arrintaas.
Sidoo kale, waaxda Amniga Gudaha ayaa la kulantay cadaadis siyaasadeed kadib markii ay muddo 20 maalmood ah la daalaa dhacaysay arrimo la xiriira miisaaniyad la’aan, halka qaar ka mid ah shaqaalaha ay shaqeynayeen iyagoo aan helin mushaar.
Kristi Noem ayaa noqotay xubintii ugu horreysay ee ka tirsan golaha wasiirrada ee laga qaado xilka intii lagu guda jiray muddada labaad ee Madaxweyne Trump.
Magacaabista Senator Markwayne Mullin ayaa u baahan doonta ansixinta Golaha Senate-ka, inkastoo sharciga federaalka uu oggolaanayo inuu si kumeel-gaar ah xilka u qabto inta ay socoto geeddi-socodka ansixinta.siibada.
