Wararka24: 5-02-2026 Soomaaliya ayaa si xawli ah u wada dhismaha deked cusub oo laga hirgelinayo magaalada Hobyo ee gobolka Mudug, mashruuc lagu sheegay mid istaraatiiji ah oo lagu xoojinayo ganacsiga badda iyo horumarinta dhaqaalaha dalka.
Mas’uuliyiin ku lug leh mashruuca ayaa sheegay in dhismaha dekedda Hobyo uu galay wejigii dhismaha tooska ah, iyadoo goobta la geeyay qalab culus iyo agabkii lagu bilaabi lahaa howlaha waaweyn. Xeebta Hobyo ayaa haatan laga arkayaa wiishash iyo cagafyo ka shaqeynaya mashruuca.
Mashruuca ayaa waxaa hormuud ka ah Shirkadda Maalgashiga Hobyo (HICO) oo leh boqolkiiba 70 saamiga mashruuca, halka boqolkiiba 30 ay leedahay shirkadda dhismaha ee Turkiga laga leeyahay ee Metag Holding, taas oo maamuleysa dhinacyada farsamada.
Mas’uul ka tirsan HICO ayaa u sheegay wargeyska The Africa Report in dhismaha dekedda uu ku socdo qorshihii loo dejiyay, iyadoo la rajeynayo in mashruucu noqdo mid kor u qaada awoodda dekedaha Soomaaliya iyo ganacsiga gobolka.
Khubaro dhaqaale ayaa aaminsan in dekedda Hobyo ay noqon karto marin cusub oo ganacsi oo u adeegta dalka Itoobiya oo aan lahayn bad, islamarkaana aad ugu tiirsan dekedda Jabuuti. Masaafada u dhow ee Hobyo ay Itoobiya u jirto ayaa la sheegay inay siin karto waddo kale oo ay ku soo dejiso ama ka dhoofiso badeecooyinka.
Falanqeeyayaasha ayaa sidoo kale xusay in Hobyo ay taariikh ahaan ahayd xarun ganacsi oo muhiim ah oo isku xirta Soomaaliya iyo suuqyada kale ee gobolka, taas oo hadda la doonayo in loo beddelo deked casri ah oo qaadi karta maraakiibta waaweyn ee xamuulka.
Si kastaba ha ahaatee, khubaro ayaa ka digaya in mashruuca uu wajihi karo caqabado ay ka mid yihiin arrimaha amniga, xaaladda siyaasadeed iyo tartanka ka iman kara dekedaha kale ee gobolka Geeska Afrika.
