Wararka24: 4-02-2026 Ra’iisul Wasaare Ku-xigeenka Xukuumadda Federaalka Soomaaliya, Saalax Axmed Jaamac, iyo Guddoomiyaha Maamulka Gobolka Banaadir ahna Duqa Muqdisho, Dr. Xasan Maxamed Xuseen (Muungaab), ayaa kulan ku yeeshay magaalada Muqdisho oo ay kaga wada hadleen xaaladda guud ee dalka iyo horumarinta caasimadda.
Kulanka ayaa diiradda lagu saaray dardargelinta hawlaha muhiimka ah ee horumarinta Muqdisho iyo xoojinta dowlad-dhiska, iyadoo la tixraacayo himilada Madaxweynaha Jamhuuriyadda Federaalka Soomaaliya Xasan Sheekh Maxamuud ee ku aaddan nabadgelyada, midnimada iyo gaarsiinta adeegyada bulshada ee muwaadiniinta.
Labada mas’uul ayaa isla gartay muhiimadda ay leedahay wada shaqeynta hay’adaha dowladda ee heer federaal iyo heer gobol si loo xaqiijiyo yoolalka qaran iyo kalsoonida shacabka ay ku qabaan dowladdooda.
Kulanka waxaa sidoo kale goobjoog ka ahaa Guddoomiye Ku-xigeenka Amniga iyo Siyaasadda Maamulka Gobolka Banaadir Maxamed Axmed Diiriye (Yabooh), iyadoo lagu adkeeyay in la sii xoojiyo iskaashiga hay’adaha dowladda ee la xiriira horumarinta caasimadda iyo adeegyada bulshada.
