Wararka24: 4-02-2026 Hay’adaha amniga Mareykanka ayaa ka digay suurtagalnimada in Iiraan ama kooxo taageersan ay beegsadaan gudaha Mareykanka, kaddib dilkii Hoggaamiyihii Sare ee Iiraan, Ayatollah Cali Khamenei, oo lagu sheegay inuu ku dhintay duqeymo ay fuliyeen Mareykanka iyo Israa’iil.
Qiimeyn sirdoon oo kasoo baxday Xafiiska Sirdoonka iyo Falanqeynta ee Waaxda Amniga Gudaha Mareykanka (DHS) ayaa tilmaantay in Iiraan iyo kooxaha la shaqeeya ay kordhin karaan falal aargoosi ah.
Warbixinta ayaa sheegtay in inkasta oo weerar ballaaran uu yahay mid aan si weyn loo filayn, haddana ay jirto suurtagalnimada weerarro qorsheysan ama falal kale oo khatar ku ah amniga gudaha Mareykanka.
DHS ayaa sidoo kale muujisay in khatarta ugu dhow ay noqon karto weerarro dhanka internet-ka ah oo ay fuliyaan kooxo wax jabsada oo taageersan Iiraan. Weeraradan ayaa isugu jiri kara faragelin lagu sameeyo boggaga internet-ka iyo weerarro lagu curyaamiyo adeegyada elektarooniga ah.
Xoghayaha Amniga Gudaha Mareykanka, Kristi Noem, ayaa sheegtay in hay’adaha sirdoonka iyo kuwa fulinta sharcigu ay si dhow ula socdaan xaaladda. Waxay tilmaantay in dowladda Mareykanku ay qaadeyso tallaabooyin lagu xoojinayo amniga gudaha dalka.
Dhanka kale, xiisadda Bariga Dhexe ayaa weli sii kordheysa, iyadoo Iiraan ay sii waddo weerarro gantaallo iyo diyaarado aan duuliye lahayn oo ay ku beegsaneyso bartilmaameedyo la xiriira Mareykanka iyo xulafadiisa ee gobolka Khaliijka.
Mas’uuliyiinta Mareykanka ayaa sheegay in xaaladda amni ee gobolka iyo gudaha dalka labadaba si dhow loo kormeerayo.
