Wararka24: 3-03-2026 Qaybo badan oo ka mid ah gobollada Soomaaliya ayaa wajahaya abaar ba’an oo si weyn u saameysay nolosha dadka iyo xoolaha, iyadoo laga cabsi qabo in xaaladdu isu beddesho macluul haddii aan la helin gargaar degdeg ah.
Degaano badan ayaa laga soo wariyay barakac ballaaran, kadib markii qoysaskii ku noolaa ay u hayaameen meelaha laga heli karo biyo iyo cunto. Qaar ka mid ah dadka barakacay ayaa ka tagay xoolahoodii, kuwaas oo u baaba’ay haraad iyo daaq la’aan.
Guddoomiyaha Hay’adda Maareynta Masiibooyinka Qaranka (SODMA), Maxamuud Macallin Cabdulle, oo kormeer ku tagay deegaanno ay abaartu si daran u saameysay, ayaa sheegay in xaaladdu aad u liidato. “Waxaan indhahayga ku arkay xoolo cunaya bakhtiga xoolo kale, taas oo ka dhalatay abaarta dalka ka jirta,” ayuu yiri, isagoo xusay in baahida ugu weyn ee dadka ay tahay biyo.
Gobollada Koonfurta, Bartamaha iyo Waqooyiga dalka ayaa laga soo sheegay saameyn xooggan oo abaarta ah, gaar ahaan qoysaska xoolo-dhaqatada iyo beeraleyda. Mas’uuliyiintu waxay ku baaqeen in si degdeg ah loo kordhiyo gurmadka bini’aadantinimo si loo yareeyo halista sii kordheysa ee nolol xumo iyo cunno yari.
— Wararka24
