Wararka24: 3-02-2026 Dowladda Federaalka Soomaaliya ayaa xaqiijisay in la dilay sarkaal sare oo ka tirsanaa Al-Shabaab, kaas oo lagu tuhunsanaa inuu ka dambeeyay weerarro dhowr ah oo ka dhacay magaalada Muqdisho sanadkii 2025.
Hay’adda Sirdoonka iyo Nabad-Sugidda Qaranka (NISA) ayaa war ay soo saartay ku sheegtay in ninka la dilay uu watay magacyo kala duwan, oo ay ka mid ahaayeen Kamaludin Yoonis Maxamed, Salim Nur Sheekh Cabdiraxiin, Caraale iyo Cabdullaahi Xasan Cali.
Sida lagu sheegay warka, sarkaalkan ayaa lagu eedeeyay inuu door ku lahaa qorsheynta iyo hagidda weerarro lagu qaaday xarumo amni iyo goobo tababar.
NISA ayaa sheegtay in howlgalka lagu dilay sarkaalkan uu ka dhacay deegaanka Hantiwadaag ee gobolka Shabeellaha Hoose, kaddib howlgal ay iska kaashadeen Ciidanka Xoogga Dalka Soomaaliyeed iyo ciidamo ka tirsan Uganda oo qayb ka ah howlgalka Midowga Afrika ee Soomaaliya.
Hay’addu waxay xustay in dabagalka ninkan uu socday in ka badan shan bilood, isla markaana uu ku dhuumanayay deegaanno ay dad rayid ahi ku noolaayeen.
Dowladdu waxay sheegtay in inta howlgalka socday si gaar ah loo ilaalinayay badbaadada shacabka, isla markaana lagu beegsaday fariisimo ay Al-Shabaab ku lahayd gobolka.
NISA ayaa ku adkeysatay in dagaalka ka dhanka ah kooxda uu sii socon doono ilaa laga xaqiijiyo amni iyo xasillooni waarta, iyadoo shacabka loogu baaqay inay laamaha ammaanka la wadaagaan macluumaad kasta oo la xiriira dhaqdhaqaaqyada kooxda.
