Wararka24: 20-02-2026 Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta ku qaabilay Xarunta Madaxtooyada Qaranka xubnaha iyo hoggaanka Golaha Mustaqbalka Soomaaliyeed, kaddib markii ay ka soo jawaabeen gogosha wadatashi ee ay fidisay Dowladda Federaalka Soomaaliya.
Kulanka oo ahaa mid si rasmi ah u furmay ayaa diiradda lagu saaray xaaladda guud ee dalka, gaar ahaan hannaanka doorashooyinka, adkeynta midnimada iyo wadajirka bulshada Soomaaliyeed, gurmadka abaaraha ka jira qaybo kamid ah dalka, iyo dardargelinta dagaalka ka dhanka ah Al-Shabaab.
Madaxweynaha ayaa xubnaha Golaha Mustaqbalka ku bogaadiyay ka soo jawaabista gogosha wadatashiga, isagoo xusay in wadahadal iyo is-afgarad lagu wajaho caqabadaha siyaasadeed iyo amni ee dalka horyaalla, si looga fogaado khilaaf hor leh.
Dhinaca kale, xubnaha Golaha Mustaqbalka ayaa muujiyay diyaar garow ku aaddan ka qeybgalka wadahadallada, iyagoo carrabka ku adkeeyay baahida loo qabo in la helo hannaan wadatashi oo furan, laguna xalliyo arrimaha khilaafka dhaliyay, gaar ahaan doorashooyinka iyo dib-u-eegista dastuurka.
Kulankan ayaa qeyb ka ah dadaallada socda ee lagu doonayo in lagu yareeyo xiisadaha siyaasadeed, looguna gogol xaaro wada-hadal rasmi ah oo lagu xallinayo caqabadaha siyaasadeed ee dalka, xilli ay Soomaaliya wajaheyso duruufo amni iyo bani’aadannimo oo is biirsaday.
