Wararka24: 13-02-2026 Golaha Nabadda iyo Ammaanka ee Midowga Afrika (AU) ayaa si cad u xaqiijiyay mar kale midnimada iyo madax-bannaanida dhuleed ee Jamhuuriyadda Federaalka Soomaaliya, isaga oo si adag u diiday tallaabo kasta oo lagu aqoonsanayo Somaliland inay tahay dal madax-bannaan.
Bayaan ka soo baxay kulan heer wasiir oo ka dhacay magaalada Addis Ababa, ayaa goluhu ku sheegay in aqoonsiga hal-dhinac ah ee Israa’iil siisay Somaliland uu yahay mid sharci-darro ah, isla markaana aan wax saameyn ah ku lahayn sharciga caalamiga ah.
Golaha Nabadda iyo Ammaanka ayaa ka dalbaday Israa’iil inay si degdeg ah uga laabato go’aankaas, iyagoo carrabka ku adkeeyay in “cidna aanay lahayn awood ama sharciyad ay ku beddesho qaab-dhismeedka dhuleed ee dal xubin ka ah Midowga Afrika.”
Goluhu wuxuu sidoo kale muujiyay walaac ku aaddan cawaaqibka ka dhalan kara tallaabooyinka hal-dhinac ah ee noocan ah, kuwaas oo halis gelin kara xasilloonida gobolka iyo mabda’a ilaalinta xuduudaha dalalka Afrika.
Bayaanka ayaa xusay in go’aanka Israa’iil ee 26-kii Diseembar ee sanadkii hore lagu dhawaaqay uu yahay mid si buuxda uga hor imanaya mowqifka Midowga Afrika iyo heshiisyada caalamiga ah ee dhowra midnimada dalalka xubnaha ka ah AU.
Dhanka kale, Golaha Nabadda iyo Ammaanka ee Midowga Afrika ayaa soo dhaweeyay guulaha amni ee dhawaan laga gaaray dagaalka lagula jiro Al-Shabaab, isagoo ku bogaadiyay ciidamada ammaanka Soomaaliya iyo howlgalka Midowga Afrika ee AUSSOM doorka ay ka qaadanayaan sugidda amniga iyo xasilinta deegaannada laga xoreeyay kooxaha argagixisada.
