Wararka24: 13-02-2026 Golaha Mustaqbalka Soomaaliyeed ayaa sheegay in ay weli ka go’an tahay ka qeybgalka wada-hadallada siyaasadeed ee u dhexeeya mucaaradka iyo Dowladda Federaalka Soomaaliya, inkastoo ay cambaareeyeen dhacdo ay ku tilmaameen is-hortaag amni oo lagu sameeyay hoggaamiyeyaashooda xilli ay ku wajahnaayeen kulan la qorsheeyay.
Goluhu wuxuu sheegay in ujeedkoodu yahay in la gaaro xal looga baaqsado firaaq dastuuri ah iyo hubanti la’aan siyaasadeed, isla markaana lagu heshiiyo hannaan doorasho oo dalka u horseeda xasillooni siyaasadeed. Waxay ku adkeeysteen in wada-hadalku yahay waddada kaliya ee looga bixi karo khilaafaadka taagan.
Dhanka kale, Wasaaradda Amniga Gudaha ayaa sheegtay in wixii dhacay ay la xiriireen habraaca amniga garoonka Aadan Cadde, isla markaana aan cid gaar ah loo hor istaagin, balse la adkeeyay nidaamka gelitaanka iyo xakamaynta ciidamo hubeysan oo tiro badan.
Ra’iisul Wasaaraha Xukuumadda Federaalka Soomaaliya, Xamza Cabdi Barre, ayaa xalay booqday qaar ka mid ah hoggaamiyeyaasha mucaaradka, isagoo u xaqiijiyay in dowladda ay ka go’an tahay wadahadal furan iyo dejinta xiisadda siyaasadeed, si dalka looga badbaadiyo qalalaase hor leh.
