Muqdisho (Wararka24)– Isbeddel cusub oo dhanka amniga ah ayaa si rasmi ah uga billowday xiriirka u dhexeeya Soomaaliya iyo Mareykanka, kadib magacaabista Axmed Macallin Fiqi oo loo doortay Wasiirka Gaashaandhigga Soomaaliya. Tallaabadan ayaa fure u noqotay dib-u-heshiisiin siyaasadeed iyo dib-u-dhiska kalsoonidii laba geesoodka ahayd ee aad uxumaa sanadihii dambe.
Madaxweyne Xasan Sheekh Maxamuud ayaa magacaabista Fiqi u adeegsaday farriin cad oo diblomaasiyadeed, taasoo ku socotay saaxiibada beesha caalamka – gaar ahaan Mareykanka – si loo muujiyo rabitaanka dowladda ee la xiriira isbeddel iyo hufnaan cusub oo lagu hago Wasaaradda Gaashaandhigga.
Saacado un kadib markii xilka lagu wareegay, Wasiir Fiqi wuxuu la kulmay Danjiraha Mareykanka ee Soomaaliya, Richard H. Riley, oo sheegay in Mareykanku diyaar u yahay inuu dib u furo mashaariic amni oo horay loo hakiyay. Wadahadallada ayaa diiradda lagu saaray barnaamijyo ay kamid yihiin tababarro ciidan iyo qalabeyn loogu talagalay Ciidamada xooga dalka ee DF somalia.
Dadaalladan cusub waxaa sii xoojiyay booqashadii uu Muqdisho ku yimid Taliyaha AFRICOM, General Michael Langley, oo kulan gaar ah la yeeshay Madaxweynaha Soomaaliya. Kulankan ayaa lagu tilmaamay mid xaqiijinaya in Mareykanku si buuxda ugu qanacsan yahay hoggaanka cusub ee difaaca.
Dhinaca kale, dib-u-soo laabashada General Odawaa Yuusuf Raage oo markale loo xilsaaray hoggaanka Ciidanka Xoogga Dalka Soomaaliyeed ayaa la sheegay inay sare u qaaday kalsoonida gudaha iyo dibadda. Ilo-wareedyo wasaaradeed ayaa xaqiijiyay in dalal dhowr ah ay billaabeen xiriir toos ah oo loogu talagalay iskaashi ciidan iyo taageero farsamo.
Sidoo kale, saraakiil Mareykan ah ayaa soo jeediyay qorsheyaal cusub oo la xiriira la-dagaallanka xagjirnimada, kuwaasoo isugu jira xeelado amni iyo kuwo warbaahineed oo lagu xoojinayo wacyiga bulshada si loo wiiqo fikradaha xagjirka ah.
Kalsoonida lagu qabo Wasiir Fiqi iyo Taliye Odawaa ayaa noqotay saldhig uu Mareykanku ku dhiso dib-u-habeynka iskaashiga. Hoggaan cusub oo aan lagu eedeyn musuqmaasuq ayaa ka dhigan in Soomaaliya ay diyaar u tahay inay la timaado daahfurnaan iyo isla xisaabtan dhab ah.
Diblomaasiyaddan firfircoon iyo dadaallada degdegga ah ee dib-u-heshiisiinta ah ayaa loo arkaa in ay dib u soo noolayn karaan taageeradii beesha caalamka, gaar ahaan Mareykanka, oo ah lammaane istiraatiiji ah marka laga hadlayo nabadeynta iyo amniga Soomaaliya.
Wararka24 – Xog rasmi ah oo faahfaahin degdeg ah
