Madaxweynaha Mareykanka, Donald Trump, ayaa sheegay in nacaybka sii kordhaya ee loo qabo Israa’iil uu ka mid ahaa sababaha keenay guuldarrada xisbiga Jamhuuriga ee doorashadii dhexe.
Trump ayaa hadalkan ka sheegay wareysi uu siiyay barnaamijka 60 Minutes ee telefishinka CBS, kaas oo la sii daayay Axaddii.
“Ma ay jeclayn dagaalka. Ma ay jeclayn in qiimaha shidaalku kor u kacay,” ayuu yiri Trump, isagoo ka hadlayay cod bixiyeyaasha.
“Waxaa jira nacayb weyn oo la yaab leh oo loo qabo Israa’iil,” ayuu intaa ku daray.
Trump wuxuu sidoo kale sheegay in uu ku adkaaday inuu ku qanciyo cod bixiyeyaashii isaga taageeray inay u codeeyaan musharrixiinta qaar ee uu taageerayay.
Madaxweynaha ayaa xusay in “Israa’iil aysan jiri lahayn la’aanteen,” isagoo sheegay in dalalka uu Mareykanku ilaaliyay ay dib u bixin doonaan kharashka dagaalka.
Dimuqraadiyiinta ayaa doorashadii 3-da Noofembar kula wareegay aqlabiyadda labada aqal ee Koongaraska, iyagoo xisbiga Jamhuuriga kala wareegay ugu yaraan toddoba kursi oo Aqalka Sare ah, oo ay ku jiraan gobollo muddo dheer gacanta Jamhuuriyiinta ku jiray.
Ku xigeenka Madaxweynaha, JD Vance, ayaa horey u sheegay in dagaalka Iran uu ahaa sababta ugu weyn ee guuldarrada, isagoo ku baaqay in la beddelo xiriirka Mareykanka iyo Israa’iil.
Maalintii doorashada, Trump ayaa ku dhawaaqay in Mareykanku joojin doono gargaarka milatari ee sannadlaha ah ee qiyaastii 4 bilyan oo doollar ah ee uu siiyo Israa’iil, balse uu sii wadi doono iibinta hubka.
Ra’iisul Wasaaraha Israa’iil, Benjamin Netanyahu, ayaa dhankiisa sheegay in gargaarkaas loo beddeli doono “iskaashi.”
Hadallada Trump ayaa walaac ka dhex abuuray Israa’iil. Wariye Israa’iili ah oo lagu magacaabo Amir Tibon ayaa barta X ku qoray in “Dimuqraadiyiinta iyo Jamhuuriyiinta ay ku tartamayaan cidda nooga fogaan karta.”
Madaxweynaha Israa’iil, Isaac Herzog, ayaa isna sheegay in “caqabadaha hor yaal Israa’iil ay aad u waaweyn yihiin.”
Herzog ayaa dhawaan u xilsaaray Gadi Eisenkot, oo ah tartame weyn oo Netanyahu, inuu dhiso xukuumadda cusub ee Israa’iil.
Iran ayaa iyana ka jawaabtay. Wasiirka Arrimaha Dibadda Iran, Cabbaas Araqchi, ayaa sheegay in Trump uu si cad u garwaaqsaday in Mareykanku ka daalay Israa’iil.
“Mareykanku waxay si cad uga daaleen Israa’iil oo maamulladooda ku khiyaaneysa dagaallo aan dhammaad lahayn,” ayuu ku qoray barta X.
Dagaalka Iran, oo bilowday dabayaaqadii Febraayo kadib weerarro ay wada qaadeen Mareykanka iyo Israa’iil, ayaa ahaa mid aan shacabka Mareykanka ka helin taageero ballaaran.
