Wararka24: Xildhibaan Cabdullaahi Maxamed Cali (Sanbaloolshe), oo horay u soo noqday taliyaha Hay’adda Nabad-sugidda iyo Sirdoonka Qaranka (NISA), iyo siyaasiga Maxamed Daahir ayaa maanta gaaray magaalada Beledweyne ee xarunta gobolka Hiiraan, kaddib markii ay safar dhulka ah uga soo gudbeen dhinaca Itoobiya.
Sanbaloolshe ayaa la sheegay inuu ka soo kicitimay magaalada Nairobi ee dalka Kenya, isagoo markii dambe gaaray Itoobiya, halkaas oo uu uga soo gudbay magaalada Feerfeer ee gobolka Hiiraan. Ilo xog ogaal ah ayaa sheegay in magaalada Feerfeer ay kaga soo galbiyeen ciidamo iyo gaadiid dagaal oo ka baxay Beledweyne.
Xildhibaanka ayaan weli si faahfaahsan uga hadlin ujeeddada safarkiisa, balse intii uu magaalada joogay wuxuu kulamo kala duwan la yeeshay waxgaradka, siyaasiyiinta iyo xubnaha hoggaaminaya dhaqdhaqaaqa ka soo horjeeda maamulka Hirshabeelle.
Sanbaloolshe ayaa wareysi uu dhawaan magaalada Nairobi ku siiyay Gaylan Media ku sheegay in midnimada bulshada reer Hiiraan ay muhiim u tahay badbaadada maamulka Hirshabeelle, isagoo xusay in loo baahan yahay in la dhiso maamul cusub oo ay bulshada deegaanku ku mideysan tahay.
Wuxuu sidoo kale dhaliilay habkii loo maray dhismaha maamulka Hirshabeelle, isaga oo ku dooday in doorashadii lagu dhisay aysan ahayn mid loo dhan yahay, isla markaana aan lagala tashan bulshada reer Hiiraan. Wuxuu sheegay in dhinacyada uu metelo ay weli diidan yihiin habraacaas, ayna wadaan qorshe ay ku doonayaan isbeddel siyaasadeed.
Sanbaloolshe ayaa ka mid ah siyaasiyiinta sida weyn uga soo horjeeda qaabka loo dhisay maamulka Hirshabeelle, waxaana safarkiisa Beledweyne uu imanayaa xilli ay magaalada ka taagan tahay xiisad siyaasadeed iyo mid amni.
Maalmihii la soo dhaafay, ciidamo taageersan dhaqdhaqaaqa ka dhanka ah maamulka Hirshabeelle ayaa la wareegay qaybo ka mid ah xarunta maamulka gobolka Hiiraan ee ku taalla xerada Lama-galay. Tallaabadaasi waxay sii kordhisay xiisadda u dhexeysa dhinacyada isku haya maamulka gobolka.
Imaanshaha Sanbaloolshe ayaa la filayaa inuu saameyn ku yeesho dhaqdhaqaaqyada siyaasadeed ee ka socda Hiiraan, inkastoo aan weli si rasmi ah loo shaacin qorshaha uu ka damacsan yahay kulamadiisa iyo safarkiisa Beledweyne.
