Wararka24: Golaha Shacabka ee Baarlamaanka Federaalka Soomaaliya ayaa maanta diiday mooshin ay soo gudbiyeen xildhibaanno ka tirsan mucaaradka, kaas oo lagu dalbanayay in ajandaha kulanka lagu daro dood ku saabsan xaaladda siyaasadeed, amni iyo dhaqaale ee dalka.
Mooshinka ayaa xildhibaannada mucaaradku doonayeen in Golaha Shacabka uu ka yeesho dood gaar ah, iyagoo sheegay in ay jiraan arrimo u baahan in baarlamaanka si furan uga hadlo. Waxay sidoo kale ku doodayeen in goluhu leeyahay mas’uuliyadda la xiriirta la xisaabtanka dowladda iyo qiimeynta xaaladda guud ee dalka.
Markii mooshinka loo weeciyay dhanka cod-ka, waxaa cod batay xildhibaannada taageersan dowladda, kuwaas oo diiday in qodobada ku xusan mooshinka lagu daro ajandaha kulanka. Sidaas darteed, mooshinka ma uusan helin taageeradii loo baahnaa si dood looga yeesho.
Xildhibaannada taageersan dowladda ayaa ku dooday in Soomaaliya ay haatan ku jirto xaalad wanaagsan marka la eego dhinacyada siyaasadda, amniga iyo xasilloonida, sidaas darteedna aysan muhiim ahayn in mooshinkaasi laga dhigo ajande gaar ah oo Golaha Shacabka looga doodo.
Dhinaca kale, xildhibaannada mucaaradka ayaa ku adkeystay in baarlamaanka uu waajib ku yahay inuu ka hadlo xaaladda dalka, iyagoo tilmaamay inay jiraan caqabado siyaasadeed, dhaqaale iyo amni oo u baahan in si gaar ah loo baaro loogana doodo.
Diidmada mooshinka ayaa muujisay kala aragti duwanaanshaha siyaasadeed ee ka dhex jira Golaha Shacabka, gaar ahaan sida ay xildhibaannadu u qiimeynayaan xaaladda dalka iyo waxqabadka dowladda federaalka.
Kulanka maanta ayaa kusoo aadaya xilli Soomaaliya ay ka taagan yihiin doodo siyaasadeed oo la xiriira hannaanka siyaasadda, arrimaha amniga iyo jihada doorashooyinka dalka. Dowladda iyo mucaaradka ayaa marar badan isku khilaafay qaabka loo wajahayo arrimahaas iyo waqtiga loo baahan yahay in baarlamaanka uu ka doodo.
Go’aanka Golaha Shacabka ayaa ka dhigan in mooshinkii mucaaradka uusan noqon ajande loga doodo kulanka maanta, iyadoo xildhibaannada taageersan dowladda ay cod ahaan kaga adkaadeen dhinaca mucaaradka.
