Wararka24: Magaalada Boosaaso ee xarunta gobolka Bari ayaa waxaa ka dhacday dhacdo naxdin leh kadib markii wiil dhalinyaro ah uu dilay aabbihii oo lagu magacaabi jiray Yuusuf Bootaan, kana tirsanaa xildhibaannadii hore ee maamulka Puntland.
Dilkan ayaa ka dhacay xaafadda Al-Aqsa ee magaalada Boosaaso, iyadoo wararka hordhaca ah ay sheegayaan in eedeysanaha oo lagu magacaabo Maxamed Yuusuf uu aabbihii ku weeraray toorey, taas oo sababtay geeridiisa.
Dadka deegaanka iyo goob-joogayaal ayaa sheegay in dhacdadan ay argagax weyn ku abuurtay shacabka magaalada, maadaama marxuumka uu ahaa shaqsi si weyn looga yaqaanay Boosaaso iyo guud ahaan Puntland. Ciidamada ammaanka ayaa si degdeg ah u gaaray goobta falka uu ka dhacay, waxayna gacanta ku dhigeen wiilka lagu eedeeyay dilka.
Wararka la helayo ayaa sheegaya in eedeysanaha uu muddo la noolaa xaalad la xiriirta caafimaadka dhimirka, inkastoo aan weli jirin war rasmi ah oo arrintaasi kasoo baxay hay’adaha caafimaadka ama laamaha ammaanka Puntland.
Mas’uuliyiinta ammaanka ayaan wali si rasmi ah uga hadlin dhacdadan, balse waxaa socda baaritaanno ku saabsan sababta rasmiga ah ee ka dambeysay dilkan iyo xaaladda maskaxeed ee eedeysanaha. Sidoo kale, waxaa la filayaa in hay’adaha amniga ay faahfaahin dheeraad ah kasoo saaraan baaritaanka maalmaha soo socda.
Muddooyinkii dambe deegaannada Puntland, gaar ahaan magaalooyinka Boosaaso iyo Gaalkacyo, waxaa mararka qaar ka dhacayay falal amni darro oo isugu jira dilal iyo dhaawacyo, kuwaas oo walaac ku abuuray shacabka ku dhaqan halkaasi.
