Wararka24: Kooxda Daacish ayaa kordhisay weerarrada ay ku beegsaneyso ciidamada ammaanka ee Puntland, iyadoo habeenadii u dambeeyay weerarro jidgal ah ka fulisay deegaanno ka tirsan gobolka Bari, sida ay sheegayaan ilo amni.
Wararka ayaa tilmaamaya in dagaalamayaal ka tirsan kooxda ay weerar ku qaadeen deegaanka Dhaadaar, oo hore looga saaray bishii Febraayo 2025 intii uu socday howlgalka Calmiskaad. Ujeeddada weerarka ayaa la sheegay inay ahayd in lagu gubo ceel biyood cusub oo maamulka Puntland ka hirgeliyay halkaasi.
Ciidamada ammaanka ayaa la sheegay inay ka hortageen weerarka, isla markaana fashiliyeen qorshahaas, inkastoo saddex askari ay ku dhaawacmeen. Weerarkan ayaa imanaya xilli ay jireen duqeymo hore oo ka dhacay isla gobolka.
Dhanka kale, deegaanka Togga Jaceel ayay ka fuliyeen weerar jidgal ah oo lagu beegsaday ciidamo watay dhaawacyo laga soo qaaday dagaallo hore. Ilo deegaanka ah ayaa sheegay in gurmad loo fidiyay ciidamada, balse faahfaahin buuxda weli lama helin.
Sidoo kale, waxaa la xaqiijiyay geerida askari lagu magacaabo Ayaanle Tilikh, iyadoo kooxda ay gubtay gaari ciidan oo ay la socdeen askarta la weeraray. Tani waxay muujinaysaa in weerarrada ay sii kordhayaan.
Dhacdooyinkan ayaa kusoo aadaya xilli ay jiraan cabashooyin ku saabsan hoos u dhac ku yimid howlgaladii ciidamada Puntland ee aagga Calmiskaad. Ilo kala duwan ayaa sheegaya in caqabado dhinaca sahayda ah ay saameyn ku yeesheen dagaalka.
Madaxweynaha Puntland Saciid Cabdullaahi Deni ayaa magacaabay taliye cusub oo hoggaamiya howlgalada, si loo xoojiyo dagaalka ka dhanka ah kooxda.
