Wararka24: Madaxweynaha Soomaaliya Xasan Sheekh Maxamuud ayaa kulan magaalada Addis Ababa kula yeeshay Ra’iisul Wasaaraha Itoobiya Abiy Axmed, iyadoo labada hoggaamiye ay ka wada hadleen xoojinta xiriirka labada dal iyo arrimo la xiriira amniga gobolka.
Kulanka ayaa diiradda lagu saaray iskaashiga dhinacyada amniga, dhaqaalaha, horumarka iyo dadaallada lagu xoojinayo xasilloonida Geeska Afrika, sida lagu sheegay war kasoo baxay madaxtooyada Soomaaliya.
Madaxweyne Xasan Sheekh ayaa sidoo kale Ra’iisul Wasaare Abiy Axmed ugu hambalyeeyay guusha uu xisbigiisu ka gaaray doorashooyinka ka dhacay Itoobiya, isagoo u rajeeyay sii socoshada dadaallada lagu horumarinayo dalkaasi.
Safarka Madaxweynaha ee Itoobiya ayaa kusoo beegmaya kadib booqasho uu hore ugu tagay Jabuuti, halkaas oo uu kaga qeyb galay munaasabadda xuska 49-guurada xornimada dalkaasi.
Toddobaadkii hore ayuu sidoo kale Madaxweynaha Soomaaliya booqasho ku tegay Kenya, isagoo magaalada Narok kula kulmay Madaxweynaha Kenya William Ruto, waxaana labada dhinac ay ka wada hadleen xoojinta xiriirka laba geesoodka ah iyo iskaashiga dhinacyada muhiimka ah.
Itoobiya, Kenya iyo Jabuuti ayaa ka mid ah dalalka deriska la ah Soomaaliya, waxayna door muuqda ku leeyihiin howlgalka Taageerada iyo Xasilinta Midowga Afrika ee Soomaaliya (AUSSOM), kaas oo taageera dadaallada lagu sugayo amniga iyo la dagaallanka Al-Shabaab.
Kulamadan diblomaasiyadeed ayaa imanaya xilli ay dalka ka jiraan doodo siyaasadeed oo ku saabsan hannaanka doorashooyinka iyo mustaqbalka geeddi-socodka siyaasadeed ee Soomaaliya.
