Wararka24: Wasiirka Waxbarashada, Hiddaha iyo Tacliinta Sare ee Soomaaliya Faarax Sheekh Cabdulqaadir ayaa ku baaqay in la sameeyo manhaj waxbarasho oo mideysan iyo nidaam adag oo lagu xakameeyo tayada macallimiinta dalka.
Wasiirka ayaa sheegay in nidaamka federaalka uu fududeeyay ballaarinta adeegyada waxbarashada, gaar ahaan doorka ay bulshada iyo hay’adaha gaarka loo leeyahay ku yeesheen dhismaha iskuullo iyo jaamacado meelo badan oo dalka ah.
Si kastaba, wuxuu xusay in horumarkaasi uu la yimid caqabado, maadaama hay’ado kala duwan ay sameysteen manhajyo iyo imtixaano u gaar ah, taas oo saameyn ku yeelatay isku mid ahaanshaha iyo tayada waxbarashada.
Wuxuu carrabka ku adkeeyay in loo baahan yahay mideynta qodobbada aasaasiga ah ee nidaamka waxbarashada, si loo hubiyo in ardaydu helaan waxbarasho tayo leh oo isku heer ah guud ahaan dalka.
Dhanka kale, wasiirka ayaa muujiyay walaac ku saabsan tayada macallimiinta, isagoo sheegay in la qorsheynayo nidaam rasmi ah oo ruqsad siinta ah, kaas oo oggolaan doona oo keliya macallimiinta leh aqoon iyo shahaadooyin sax ah inay wax dhigaan.
“Qof walba ma noqon karo macallin isaga oo aan lahayn aqoon ku filan,” ayuu yiri wasiirka, isaga oo xusay in arrintan ay tahay mid si gaar ah muhiim u ah horumarinta waxbarashada.
Sidoo kale, wuxuu tilmaamay muhiimadda ay leedahay in la dhiso nidaam qaran oo xogta waxbarashada lagu maareeyo, si loo fududeeyo qorsheynta iyo la socodka ardayda, halka tacliinta sare uu sheegay inay weli hoos timaaddo mas’uuliyadda dowladda federaalka.
