Wararka24: Dowladda Turkey ayaa shaacisay inay si toos ah u kordhinayso ka qaybgalkeeda dagaalka ka dhanka ah kooxaha Al-Shabaab iyo Daacish ee gudaha somaaliya Go’aankan ayaa muujinaya isbeddel ku yimid doorka amni ee Turkiga ee gobolka.
Wasiirka Arrimaha Dibadda Turkiga Hakan Fidan ayaa sheegay in dalkiisu uu si buuxda u taageerayo dadaallada ay wadaan ciidamada Soomaaliya. Wuxuu caddeeyay in taageerada Turkiga ay noqon doonto mid la taaban karo oo ku wajahan la dagaallanka kooxaha argagixisada.
Mas’uulku wuxuu xusay in istaraatiijiyadda cusub ay ku jirto bixinta tababar, qalab militari iyo la-talin istiraatiiji ah. Wuxuu tilmaamay in Ankara ay doonayso inay xoojiso awoodda ciidamada maxalliga ah si ay ula tacaalaan khataraha amni.
Sidoo kale, Wasiirku wuxuu sheegay in taageerada Turkiga aysan ku koobnaan doonin Soomaaliya oo keliya, balse ay gaari doonto dalal kale oo Afrika ku yaalla. Wuxuu tusaale u soo qaatay Nigeria oo la tacaalaysa kooxo hubeysan.
Turkiga ayaa hore uga hirgeliyay Soomaaliya mashaariic horumarineed iyo xarumo tababar oo lagu tayeynayo ciidamada. Joogitaankiisa ayaa si weyn u kordhay sanadihii u dambeeyay, isagoo noqday mid ka mid ah saaxiibada ugu muhiimsan ee Soomaaliya.
Khabiirada ayaa sheegaya in taageerada noocan ah ay kor u qaadi karto awoodda ciidamada Soomaaliya. Waxay sidoo kale tilmaameen in iskaashiga militari uu muhiim u yahay xasilinta dalka iyo yareynta halista kooxaha hubeysan.
Go’aankan cusub ayaa kusoo beegmaya xilli ay sii socdaan howlgalada ka dhanka ah Al-Shabaab, iyadoo la rajeynayo in iskaashigan uu wax ka beddelo xaaladda amni ee dalka.
