Wararka24: 27-01-2026 Dowladda Boqortooyada Ingiriiska ayaa wajahaysa dhaliilo isa soo taraya oo la xiriira istiraatiijiyaddeeda Geeska Afrika, iyadoo falanqeeyayaal siyaasadeed ay ku eedeeyeen London inay ku dhaqmeyso siyaasad laba-wajiilenimo ah marka ay timaaddo arrimaha Soomaaliya.
Inkasta oo UK ay hadal ahaan u taageerto midnimada, madax-bannaanida iyo xasilloonida Soomaaliya, haddana dhaliilayaashu waxay tilmaamayaan in maalgashiga ay hay’addeeda British International Investment (BII) ku leedahay dekedda Berbera uu si toos ah u wiiqayo mowqifkaas diblomaasiyadeed.
Maalgashiga Berbera, oo ay wada leeyihiin BII, shirkadda DP World ee Imaaraadka laga leeyahay iyo maamulka Somaliland, ayaa loo arkaa mid ka baxsan ganacsi kaliya, maadaama dekeddu ku taallo marin istiraatiiji ah oo muhiim u ah Badda Cas iyo Gacanka Cadmeed.
Dhanka kale, UK ayaa si joogto ah ugu baaqda xabbad-joojin iyo isla-xisaabtan caalami ah oo ku saabsan colaadda Suudaan, balse kormeerayaal ayaa sheegaya in ficilladeedu aysan la jaan-qaadin hadalladeeda, maadaama ay ka gaabisay tallaabooyin adag oo la xiriira dalal lagu eedeeyo taageeridda dhinacyada dagaalka.
Xiisadda ayaa sii xoogeysatay kadib markii Israa’iil ay ku dhawaaqday aqoonsiga Somaliland, arrintaas oo Dowladda Federaalka Soomaaliya ku tilmaantay xad-gudub ka dhan ah qaranimada dalka. Falanqeeyayaashu waxay aaminsan yihiin in xaaladdan ay sii iftiimisay khilaafka u dhexeeya hadalka UK iyo ficilkeeda dhabta ah.
Khubaro arrimaha gobolka ayaa ku qeexay hab-dhaqanka London mid ku saleysan danaha ganacsi ee Khaliijka iyo Geeska Afrika, iyagoo sheegay in UK ay isku dayeyso inay ka fogaato go’aanno adag oo dhaawici kara saameynteeda dhaqaale, xilli gobolka uu noqday meel ay ku kulmaan loollanka amni iyo mid dhaqaale.
