Wararka24: Dowladda Federaalka Soomaaliya ayaa si kulul u cambaareysay weerar loo adeegsaday diyaarado aan duuliye lahayn oo lagu bartilmaameedsaday Boqortooyada Sacuudiga, kadib markii ciidamada difaaca cirka ee boqortooyada ay sheegeen inay soo rideen diyaaradahaasi kahor inta aysan waxyeello geysan.
War-saxaafadeed kasoo baxay Wasaaradda Arrimaha Dibadda Soomaaliya ayaa lagu sheegay in weerarkaasi uu yahay xadgudub ka dhan ah madax-bannaanida Sacuudiga, isla markaana uu khatar ku yahay nabadda iyo xasilloonida gobolka Bariga Dhexe.
Dowladda Soomaaliya ayaa sheegtay inay si buuxda ula garab taagan tahay Sacuudiga, ayna taageersan tahay tallaabo kasta oo lagu ilaalinayo ammaanka, midnimada dhuleed iyo xasiloonida boqortooyada. Qoraalka ayaa sidoo kale lagu xusay in weerarrada lagu qaado dalalka iyo xarumaha muhiimka ah ay sii kordhin karaan xiisadaha gobolka.
Wasaaradda Arrimaha Dibadda ayaa ugu baaqday dhinacyada ku lugta leh xiisadaha gobolka inay muujiyaan is-xakameyn iyo wada hadal, si looga hortago xaalado amni darro oo horleh. Dowladda Soomaaliya ayaa sidoo kale ku boorisay dhammaan dhinacyada inay dhowraan sharciga caalamiga ah iyo qawaaniinta xiriirka dowladaha.
Cambaareyntan ayaa kusoo aadeysa xilli gobolka Bariga Dhexe uu wajahayo xaalado siyaasadeed iyo kuwo amni oo cakiran, kuwaas oo sare u qaaday walaaca laga qabo in colaadaha sii fidaan. Dalal badan oo gobolka ah ayaa maalmihii lasoo dhaafay kordhiyay feejignaanta amniga, kadib weerarro iyo hanjabaado isa soo taraya.
Soomaaliya iyo Sacuudiga ayaa leh xiriir diblomaasiyadeed iyo iskaashi dhinacyo badan leh, gaar ahaan arrimaha amniga, dhaqaalaha iyo taageerada bani’aadannimo ee gobolka.
